Մադրիդում կրկին բողոքի ակցիա է անցկացվել ընդդեմ միապետության

Իսպանիայի մայրաքաղաք Մադրիդում կրկին բողոքի ակցիա է անցկացվել ընդդեմ երկրի կառավարման միապետական ձևի:Ակցիային մասնակցել է մոտ հարյուր մարդ:

Ակցիայի մասնակիցները միապետությունը կոռումպացված են որակել՝ հայտարարելով, որ ցանկանում են ժողովրդական հանրապետություն ունենալ:

Ակցիային աջակցել են մի շարք կատալոնական անջատողական խմբեր ու քաղաքական կուսակցություններ, որոնք սոցցանցերի միջոցով մարդկանց կոչ են արել միանալ ցուցարարներին:

Ավելի վաղ միապետության դեմ ցույցեր էին տեղի ունեցել հունիսի սկզբին:

Իսպանիան խորհրդարանական միապետություն է. թագավորը պետության ղեկավարն է: Ներկայում երկրում հետաքննություն է ընթանում թագավոր Ֆիլիպ 6-րդի հոր՝ նախկին միապետ Խուան Կառլոս 1-ինի առնչությամբ. նա կասկածվում է կոռուպցիայի համար:

Այս տարվա մարտին Ֆիլիպ 6-րդը հրաժարվել է հոր ժառանգությունից, ինչպես նաև Խուան Կառոս 1-ին զրկել տարեկան թոշակից: Ֆիլիպ 6-րդի որոշումը պայմանավորված է կոռուպցիոն սկանդալով, որում ներքաշված է հայրը: Ենթադրվում է, որ Խուան Կառոս 1-ինը միլիոնավոր եվրոներ է ստացել Սաուդյան Արաբիայի հետ կապ ունեցող գաղտնի օֆշորային հիմնադրամից: Իսպանիայի թագավորական տան տարածած պաշտոնական հայտարարությունում նշվում է, որ խոսքը Lucum հիմնադրամի մասին է: 
Բացի այդ, միապետը հրաժարվել է հորից ժառանգել որևէ ակտիվ, ներդրումային կամ ֆինանսական կառույց, որոնց ծագումը կարող է կասկածելի լինել:

Հիշեցնենք, որ Խուան Կառլոս 1-ինը գահից հրաժարվել է 2014թ.: