Վրաստանի խորհրդարանն առաջին ընթերցմամբ ընդունել է ընտրական համակարգի մասին սահմանադրական փոփոխությունների նախագիծը

Վրաստանի խորհրդարանն առաջին ընթերցմամբ ընդունել է Սահմանադրության փոփոխությունն ընտրական համակարգի փոփոխության վերաբերյալ՝ 2020 թվականին անցկացվելիք ընտրություններին ընդառաջ:   

Ինչպես փոխանցում է Новости-Грузия-ն, այսօրվա նիստը բոյկոտել է «Միասնական ազգային շարժում» կուսակցությունը, որն օրենսդիր մարմնում ներկայացված է վեց մարդուց կազմված խմբակցությամբ: Քվեարկության համար գրանցվել են 142 պատգամավոր: Օրինագծի ընդունմանը կողմ են արտահայտվել 136-ը, դեմ՝ 5-ը: 

Փոփոխությունների նախագծի համաձայն՝ 2020-ի խորհրդարանական ընտրություններում 120 պատգամավոր կընտրվի համամասնական համակարգով և 30 պատգամավոր՝ մեծամասնական: 

Փոփոխությունները ենթադրում են նաև ընտրական անցումային շեմը կուսակցությունների համար 5 տոկոսից նվազեցնել 1 տոկոսի, իսկ դաշինքների համար անցումային շեմը, համապատասխանաբար,  կկազմի այնքան տոկոս, որքան կուսակցություն ընդգրկված կլինի միավորման կազմում: Փոփոխությունների համաձայն՝ կուսակցությունը կկարողանա միանձնյա կառավարություն ձևավորել, եթե հավաքի ընտրողների ձայների 40 տոկոսը: 

Այս տարբերակով ընտրությունների անցկացումը «Վրացական երազանք» իշխող կուսակցության և ընդդիմության միջև մարտի 8-ին կնքված համաձայնության մի մասն է: 

Խորհրդարանական ընտրություններն անցկացվելու են հոկտեմբերի 31-ին: