Վենետիկի հանձնաժողովը հաստատել է իր կարծիքը Բադասյանի կողմից հանձնաժողովին առաջադրված հարցերի վերաբերյալ

Վենետիկի հանձնաժողովը հունիսի 19-ին հաստատել է իր կարծիքը ՀՀ արդարադատության նախարար Ռուստամ Բադասյանի կողմից հանձնաժողովին առաջադրված հարցերի վերաբերյալ։ Այս մասին «Արմենպրես»-ին տեղեկացրին ՀՀ արդարադատության նախարարությունից։
 

«Հանձնաժողովը կարծիքում շեշտել է, որ գործող իշխանությունների նպատակը ժողովրդավարական չափանիշներին համապատասխանող ՍԴ մոդելը փոփոխելը և այդ մոդելից հետ կանգնելը չէ, ինչպես նաև չկա նպատակ ներդնելու այնպիսի կանոններ, որոնք թույլ կտան քաղաքական մեծամասնությանը վերահսկել դատավորների նշանակման գործընթացը: Հակառակը, պարզ է, որ իշխանությունների նպատակն է ապահովել, որ նոր դրույթներն իրագործվեն, և ՍԴ կազմը հնարավորինս շուտ արտացոլի այդ դրույթներով ներդրվող ժողովրդավարական չափանիշները: Սա լեգիտիմ նպատակ է»,- նշեցին նախարարությունում։
 

Ըստ ՀՀ արդարադատության նախարարության, Վենետիկի հանձնաժողովն իր կարծիքը պաշտոնապես կհրապարակի հունիսի 22-ին՝ երկուշաբթի։