ՏԵՍԱՆՅՈՒԹ. ՀՀ բոլոր քաղաքացիների համար պարտադիր կլինի անձը հաստատող փաստաթղթի կրումը

Երեկ մենք ասացինք, որ մեր մեծագույն խնդիրն այս պահին տեսնում ենք դիմակների կրման հետ կապված կարգապահությունը և այսօր այդ առիթով կայացրել ենք որոշումներ: Այս մասին պարետատան նիստից հետո կայացած ճեպազրույցում ասաց ՀՀ վարչապետ Նիկոլ Փաշինյանը:

«Եվ որոշումը հետևյալն է. Նախ վաղվանից ՀՀ բոլոր քաղաքացիների համար պարտադիր կլինի անձը հաստատող փաստաթղթի կրումը: Խոսքը՝ անձնագրի, ID քարտի, կամ վարորդական իրավունքի մասին է»,- ասաց վարչապետը:

Որոշման անհրաժեշտությունը վարչապետն այսպես մեկնաբանեց՝ շատ դեպքերում դիմակ կրելու խախտումների համար վարչական վարույթի հարց է առաջանում, և քաղաքացիների մոտ փաստաթղթի բացակայությունը գործընթացի արդյունավետության վրա ազդում է:

Նրա խոսքերով՝ անձը հաստատող փաստաթղթի ու դիմակի կրման կանոնների խախտումը դիտարկվելու են որպես առանձին իրավախախտումներ: Տուգանքները ևս սահմանվելու են առանձին՝ յուրաքանչյուր դեպքում 10 հազար դրամ:

Իսկ ձեռնոցներ կրելու պարտադիր պայմանը հանվել է, քանի որ, ինչպես Փաշինյանն ասաց՝ փորձը ցույց է տալիս, որ դրանց վրա սովորաբար արագ կուտակվում են որոշակի նյութեր, և ավելի լավ է կենտրոնանալ ձեռքերը ախտահանելու խնդրի վրա:

Մանրամասները՝ տեսանյութում