Մանկության տարիների իմ հերոսը հետո դարձավ իմ քաղաքական  ղեկավարը. Նորա Առուստամյան

«Գիտեմ, որ շատերդ սիրում եք, հարգում եք և ընդունում եք պարոն Ծառուկյանի արած բոլոր լավ ու վատ գործերը, ավաղ, այդ մասին ձեզ այսօր չի կարելի խոսել»: Այս մասին այսօր` հունիսի 16-ին, Ազգային ժողովում Գագիկ Ծառուկյանին անձեռնմխելիությունից զրկելու  հարցի քննարկման ժամանակ ասաց ԲՀԿ խմբակցության պատգամավոր Նորա Առուստամյանը: 

Նա նշեց, որ ինքը շինծու քաղաքական գործերի պատանդ դարձած մարդու դուստր է (նրա հայրը Ծառուկյանի մտերիմներից Սեդրակ Առուստամյանն է)։ Իսկ հիմա, ըստ Առուստամյանի, քաղաքական գործեր են կապվում նաև Ծառուկյանի մասին։

«Պարոն Ծառուկյանի եւ հորս համագործակցության երկար տարիների ընթացքում մշտապես լսել եմ պարոն Ծառուկյանի կողմից հնչեցված այս խոսքերը`ոչինչ` թող ես տուժեմ, բայց նա չտուժի, նա ընտանիք է կերակրում:

Ինձ համար հպարտություն առաջացնող երեւույթ է, որ  մանկության տարիների իմ հերոսը հետո դարձավ իմ քաղաքական  ղեկավարը  եւ այսօր ամեն գործ անելուց առաջ ականջիս հնչում են քաղաքական ղեկավարիս` մանկությանս հերոսի խոսքերը` ինչ անում ես պետք է դիմացինիդ մասին եւս մտածես»,-ասաց նա: