Հայաստանում Գագիկ Ծառուկյանի աջակիցները պահանջել են Նիկոլ Փաշինյանի հրաժարականը. «РИА Новости»-ն անդրադարձը

Ռուսաստանյան  «РИА Новости»  կայքն այսօր անդրադարձել է Հայաստանում տեղի ունեցող իրադարձություններին։ «Բարգավաճ Հայաստան» ընդդիմադիր խորհրդարանական խմբակցության ղեկավար, մեծ գործարար Գագիկ Ծառուկյանի կողմնակիցները, ում տունը խուզարկվել է կիրակի օրը, Ազգային անվտանգության ծառայության շենքի դիմաց վանկարկում էին. «Նիկոլ, հեռացիր»՝ պահանջելով վարչապետ Նիկոլ Փաշինյանի հրաժարականը, հայտնում է կայքը։

Ավելի վաղ, ԲՀԿ-ական պատգամավոր Նաիրա Զոհրաբյանը հայտնել էր Ազգային անվտանգության ծառայության անդամների կողմից Ծառուկյանի տան մոտ իրականացված խուզարկության մասին: Ըստ նրա՝ քննչական գործողությունների պատճառը կարող են լինել ֆինանսական խնդիրները, որոնք ծագել են Մարտունի քաղաքում մեծամասնության թեկնածուներից մեկի հետ 2017-ի խորհրդարանական ընտրությունների ժամանակ: 
Ավելի վաղ, Ծառուկյանը խոսել է իր տան մոտ հավաքված ցուցարարների հետ: Նա իր դեմ հնչած մեղադրանքները անվանել է շինծու, իսկ կատարվածը` քաղաքական ճնշում և շանտաժ: Պատգամավորի խոսքով՝ իրենք ուզում են վախեցնել նրան, բայց ինքը չի հանձնվի: Ծառուկյանը հավելել է, որ գնում է հարցաքննության։
Հիշեցնենք, որ հունիսի 5-ին կուսակցության քաղխորհրդի նիստում Ծառուկյանն առաջարկել է՝ կառավարությունը 100% -ով փոխվի: Ըստ նրա՝ հիմնական խնդիրն այն է, որ կառավարությունում փորձառու մարդիկ չկան: