Լկտիություն է և մանիպուլյացիաների փորձ, Ծառուկյանը դատարանի կողմից արդեն իսկ արդարացվել է այդ գործի շրջանակներում. Աբովյան

Դա քաղաքականության հետ ոչ մի աղերս չունի, լկտիություն է եւ մանիպուլյացիաների փորձ, որովհետեւ պարոն Ծառուկյանը դատարանի կողմից արդեն իսկ արդարացվել է այդ գործի շրջանակներում: Այս մասին այսօր՝ հունիսի 9-ին, ԱԺ-ում լրագրողների հետ զրույցում նշեց ԲՀԿ խմբակցության քարտուղար Արման Աբովյանը՝ անդրադառնալով Գագիկ Ծառուկյանի կողմից 1979 թվականին խմբակային բռնաբարությանը համար դատապարտվելու քրգործի նյութերի հրապարակմանը:

Նշենք, որ Գագիկ Ծառուկյանը արդարացվել է դեպքից 22 տարի անց՝ 2001 թվականին:

«Մենք շատ լավ գիտենք, որ խորհրդային տարիներին միլիցիան գումարներ կորզելու համար մարդկանց այ տենց իրավիճակի մեջ էր գցում: Գոյություն ունի նվազագույնը բարոյականության շեմ: Չի կարելի քաղաքականությունը խառնել անձնականի հետ: Դա ցույց է տալիս այն թեզը, որ այն եռանդով, որ լցվեցինք իրենք ԲՀԿ-ի դեմ, պարոն Ծառուկյանի դեմ կռւվ տալով, թող այդ նույն եռանդով լծվեն սոցիալ-տնտեսական իրավիճակը դզելուն, խայտառակ գործազրկությունը կանգացնելուն: Ի վերջո, կորոնավիրուսից մարդիկ են մահանում, ինչ՞վ են զբաղված: Մարդ պետք է բարոյականություն ունենա, որ չանցնի եւ հինավուրց Գյուլնազ տատի հեքիաթները բերի»,-ասաց նա: