Սևանի ջրի մակարդակը ավելի ցածր է, քան անցած և նախանցած տարի․ Էրիկ Գրիգորյան
Կառավարությունն իր այսօրվ՝ ապրիլի 23-ի նիստում որոշում կայացրեց սահմանել Հյուսիսային եւ Սեւանի ջրավազանային կառավարման տարածքներում սակավաջրություն:
Հարցը ներկայացրեց շրջակա միջավայրի նախարար Էրիկ Գրիգորյանը, ով նշեց, որ կառավարության որոշման նախագծի մշակման անհրաժեշտությունը բխում է ՀՀ ջրային օրենսգրքի 92-րդ հոդվածի պահանջներից: Նրա խոսքով, 2014-ից արդեն հայտարարված է սակավաջրություն եւս երեք ջրավազաններում՝ Արարատյան, Հրադզդանի եւ Ախուրյանի:
Վերջինիս մշակման համար հիմք է հանդիսացել Հիդրոօդերեւութաբանության եւ մթնոլորտային երեւույթների վրա ակտիվ ներգործության ծառայության կողմից հիդրոդերեւութաբանական վերլուծության արդյունքում սակավաջրության վերաբերյալ ներկայացված պաշտոնական տեղեկատվությունը, ինչպես նաեւ հաշվի է առնվել 2014 թվականի սեպտեմբերի 18-ի «Արարատյան, Հրազդանի եւ Ախուրյանի ավազանային կառավարման տարածքներում սակավաջրության եւ երաշտի մասին» որոշումը:
Ներկայացված տեղեկատվության համաձայն՝ կանխատեսումները կազմելիս հնարավորինս հաշվի են առնվել վարարումների հոսքը ձեւավորող բոլոր գործոնները։ Հաշվի առնելով արդեն իսկ դիտված եւ կանխատեսվող հիդրոօդերեւութաբանական պայմանները կանխատեսվել է, որ գետերի մեծ մասում 2020թ. գարնանային վարարումների հոսքի ծավալները եւ առավելագույն ելքերի մեծությունները սպասվում են նորմայի 50-80%-ի սահմաններում, ընդ որում գետերի մեծ մասում վարարումների հոսքի ծավալների ապահովվածությունները կանխատեսվում են 80-85%-ի սահմաններում։ Համաձայն ՀՀ ջրային օրենսգրքի 1-ին հոդվածի նման իրավիճակը սահմանվում է որպես սակավաջուր:
Նախագծով տրվել են սակավաջրություն հայտարարվելու դեպքում ջրային օրենսգրքով պահանջվող կարգավորումներ՝ որոշմամբ նշված տարածքներում ջրային ռեսուրսների օգտագործման եւ ջրային ռեսուրսների հետ կապված գործողությունների սահմանափակումներ եւ չափավորումներ, ինչպես նաեւ սահմանվել են պետական կառավարման մարմինների նկատմամբ այլ համապատասխան պահանջներ։ Հյուսիսային եւ Սեւանի ջրավազանային կառավարման տարածքներում սահմանված սակավաջրությունը կարող է վերացվել շրջակա միջավայրի նախարարի ներկայացրած առաջարկության հիման վրա:
Նախագծի ընդունումը հնարավորություն կտա սակավաջրության հետեւանքով ստեղծված իրավիճակում կանխել ջրօգտագործողների շահերի բախումները եւ մեղմել ջրային ռեսուրսների վրա ակնկալվող բացասական ազդեցությունը` հատկապես ջրապահանջի բավարարման ժամանակ, ինչպես նաեւ գտնել համապատասխան լուծումներ՝ առավել արդյունավետ օգտագործելու սահմանափակ ջրային ռեսուրսները:
Վարչապետի հարցին, թե գյուղացիների համար սա ի՞նչ է փոխում, նախարարը պատասխանեց. «Սրանով մենք ոռոգողներին, գյուղացիներին լրացուցիչ երաշխիքներ ենք տալիս, քանի որ ջուրն օգտագործվելու է ընստ առաջնահերթությունների»:
Նա նաեւ տեղեկացրեց, որ այս տարի Արփա-Սեւանով բավական ջուր են տեղափոխել Սեւանա լիճ. «Սեւանից դեռեւս ոչ մի լիտր ջուր չենք վերցրել, բայց մակարդակն ավելի ցածր է, քան անցած եւ նախանցած տարի: Այս օրերին տեղումների հաշվին միգուցե ջուր կլինի, ցուցանիշները կլավանա, բայց այն 4 հիմնական ջրամբարները, որոնք Արարատյան դաշտի համար է օգտագործվում, իրենք այս պահին շատ ավելի ցածր մակարդակի վրա են: Հույս ունենք, որ այս որոշման կիրառման կարիքը չի լինի, սա կանխարգելիչ քայլ է»,-ընդգծեց Գրիգորյանը:
