Ադրբեջանը դիտարկում է որպես տարածքներ, մենք դիտարկում ենք որպես անվտանգություն, և Արցախի անվտանգությունը զիջման ենթակա չէ. Ռուբինյան

ՀՀ ԱԺ արտաքին հարաբերությունների մշտական հանձնաժողովի նախագահ Ռուբեն Ռուբինյանն այսօր լրագրողների հետ զրույցում անդրադարձել է ԼՂ խնդրի կարգավորման գործընթացին և ՌԴ արտգործնախարար Սերգեյ Լավրովի՝ երեկ արած հայտարարությանը:

Ռուբինյանին հարց են ուղղել՝ ի՞նչ է քննարկվում հիմա:

«Ես կարծում եմ՝ երկու պնդումները՝ այն, ինչ Ադրբեջանը դիտարկում է որպես տարածքներ, մենք դիտարկում ենք որպես անվտանգություն, և Արցախի անվտանգությունը զիջման ենթակա չէ, լիովին պատասխանում են ձեր հարցին»,- ասել է նա:

Ռուբինյանը նշել է՝ որևէ փաստաթուղթ չի քննարկվում: Լրագրողները խնդրել են մեկնաբանել Սերգեյ Լավրովի հայտարարությունը, թե Արցախի հարցում քննարկվում է փուլային լուծումը:

«Ես չեմ կարծում, որ հիմա պետք է մեկնաբանեմ, թե ինչու է այս կամ այն հայտարարությունն անում այս կամ այն երկրի պաշտոնյան, ես ասում եմ իրականությունը, հղում եմ անում ՀՀ ԱԳ նախարարին, նա երեկ առավել քան հստակ, առավել քան պարզ ներկայացրել է իրավիճակը, ՀՀ դիրքորոշումը»,- ասել է Ռուբինյանը: