«Ուժեղ Հայաստան»-ի անդամը դատի է տվել «Արմավիրի տարածաշրջանային պետական քոլեջ»-ին

Արմավիրի տարածաշրջանային պետական քոլեջի նախկին կազմակերպադաստիարակչական աշխատանքների գծով կազմակերպիչ, «Ուժեղ Հայաստան» կուսակցության պատգամավորության թեկնածու Հայաստան Հակոբյանը դատական հայց է ներկայացրել ընդդեմ «Արմավիրի տարածաշրջանային պետական քոլեջ» ՊՈԱԿ-ի։

AURORANEWS-ը «Դատալեքս» դատական տեղեկատվական համակարգից տեղեկացավ, որ դատարանը վերադարձրել է Հայաստան Մաղաքի Հակոբյանի հայցադիմումն ընդդեմ «Արմավիրի տարածաշրջանային պետական քոլեջ» ՊՈԱԿ-ի։

Հակոբյանը 2026 թվականի հուլիսի 10-ին դիմել է դատարան՝ պահանջելով անվավեր ճանաչել իրեն աշխատանքից ազատելու մասին հրամանը, վերականգնել նախկին աշխատանքում, իսկ դրա անհնարինության դեպքում՝ տրամադրել համարժեք աշխատանք։ Նա նաև պահանջել է գործատուից բռնագանձել հարկադիր պարապուրդի ամբողջ ժամանակահատվածի համար նախատեսված միջին աշխատավարձը։

Դատարանի որոշման համաձայն՝ հայցադիմումին կից ներկայացված փաստաթղթերի ցանկում և փաստացի կցված փաստաթղթերում անհամապատասխանություններ են հայտնաբերվել։

Մասնավորապես, հայցվորը նշել է, որ ներկայացրել է աշխատանքային պայմանագրերի պատճենները, մինչդեռ կցված է եղել միայն 2023 թվականի նոյեմբերի 9-ին կնքված աշխատանքային պայմանագիրը։

Բացի այդ, հայցադիմումում որպես կից փաստաթուղթ նշվել է 2026 թվականի հունիսի 22-ի զեկուցագրի պատճենը, մինչդեռ, ըստ դատական ակտի, կցվել է հուլիսի 22-ով թվագրված զեկուցագիր։ Հունիսի 26-ի բացատրագիրը ներկայացված է եղել։

Դատարանը գտել է, որ այսպիսով չեն պահպանվել ՀՀ քաղաքացիական դատավարության օրենսգրքով հայցադիմումի բովանդակությանը ներկայացվող պահանջները, և որոշել է վերադարձնել հայցադիմումը։

Միաժամանակ դատարանը Հայաստան Հակոբյանին եռօրյա ժամկետ է տրամադրել՝ որոշումը ստանալու պահից սկսած, արձանագրված թերությունները վերացնելու համար։ Եթե այդ ժամկետում թերությունները վերացվեն և հայցադիմումը կրկին ներկայացվի, այն կհամարվի դատարան ներկայացված սկզբնական՝ հուլիսի 10-ի ամսաթվով։