Դուք մարդասիրական և աստվածահաճո շնորհ հանդես բերեցիք․ Ռուբեն Հայրապետյանը՝ Վեհափառի կոչին

Ֆուտբոլի ֆեդերացիայի նախկին նախագահ Ռուբեն Հայրապետյանն իր ֆեյսբուքյան էջում գրել է.

«Վեհափառ տեր,

մեր հայրենիքի համար այս դժվարագույն պահին Ձեր հնչեցրած խոսքը հավատացյալ ժողովրդի համար հնչեց որպես կարևորագույն հորդոր և արդարության վերականգնման կոչնակ:

Նշելով համավարակի պայմաններում ՀՀ երկրորդ նախագահ Ռոբերտ Քոչարյանի և առհասարակ բանտերում պահվող մեր հայրենակիցների ազատ արձակման անհրաժեշտության մասին՝ Դուք մարդասիրական և աստվածահաճո շնորհ հանդես բերեցիք՝ հայ ժողովրդին մատնանշելով համերաշխության, բարության և մեծահոգության միակ ճանապարհը:

Դարեր ի վեր հայ եկեղեցին ունեցել է ազգապահպան և կառուցողական դերակատարում: Այսօր էլ այն Ձեր սրբազան առաջնորդությամբ կատարում է ի վերուստ վերապահված իր առաքելությունը, ինչի համար իմ խորին երախտագիտությունն եմ հայտնում Ձեզ:

Թող բարեգութ Տիրոջ աջը միշտ լինի մեր ժողովրդի վրա»: