Դրական լուր ունեմ, 3-րդ անգամ հանձնված թեստը բացասական է. Գեղարքունիքի մարզպետ
Գեղարքունիքի մարզպետ Գնել Սանոսյանը ֆեյսբուքյան էջում գրառում է արել՝ տեղեկացնելով, որ կորոնավիրուսի վարակմամբ կասկածվող մարզի բնակչի երրորդ թեստը բացասական է եղել:
«Գեղարքունիքի մարզի սիրելի՛ բնակիչներ,
Ինչպես երեկ հայտնել էի, կորոնավիրուսով կասկածվող հիվանդին անհրաժեշտություն է առաջացել երրորդ անգամ հետազոտել։
Դրական լուր ունեմ բոլորիս համար` այն ԲԱՑԱՍԱԿԱՆ է։
Մեր պացիենտի բուժսպասարկման հետագա ընթացքը կկատարվի ըստ բժշկական ցուցումների։
Շնորհակալություն եմ հայտնում առողջապահության համակարգի մեր գործընկերներին, այս դեպքում հատկապես Նորք Ինֆեկցիոն կլինիկական հիվանդանոցի և Սուրբ Գրիգոր Լուսավորիչ բժշկական կենտրոնի բոլոր բուժաշխատողներին, որոնք այս օրերին աշխատում են գերծանրաբեռնված, անձնվիրաբար պայքարում յուրաքանչյուր հիվանդի առողջության և կյանքի համար և ցուցաբերում մասնագիտական բարձր պրոֆեսիոնալիզմ։
Շարունակում եմ հորդորել խստորեն հետևել պարետի ցուցումներին, պահպանել հիգիենայի կանոնները, տանից դուրս գալ խիստ կարիքի պարագայում։
Եվ հետևե՛ք պաշտոնական լրահոսին։
Առո՛ղջ եղեք»,-գրել է մարզպետը։
Ավելի վաղ լուր էր տարածվել, որ Մարտինիում թոքաբորբով հիվանդ պացիենտի մոտ կորոնավիրուս է հայտնաբերվել: Նա երկրորդ անգամ էր թետս հանձնել, որը, սակայն, բացասական է եղել: Որոշում էր կայացվել, որ ապահովության համար քաղաքացին պետք է երրորդ անգամ թեստ հանձնի:
