5 օրվա ընթացքում 330 միլիոն գլանակ զուգարանի թուղթ. ԱՄՆ-ում զուգարանի թղթի վաճառքը նոր թափ է հավաքում
ԱՄՆ-ում բնակիչները միայն վերջին շաբաթվա ընթացքում Walmart սուպերմարկետների ցանցից ավելի քան 330 միլիոն գլանակ զուգարանի թուղթ են գնել, որը հավասար է երկրի յուրաքանչյուր քաղաքացուն հասանելիք մեկական գլանակի, այս մասին ամերիկյան Today հեռուստածրագրին տված հարցազրույցում հայտնել է Walmart-ի ղեկավար Դուգ Մաքմիլոնը։
«Վերջին հինգ օրվա ընթացքում մենք այնքան զուգարանի թուղթ ենք վաճառել, որ յուրաքանչյուր ամերիկացու մեկ գլանակ կարող էինք ապահովել․ և դա միայն վերջին հինգ օրվա ընթացքում»,- նշել է առևտրային ցանցի ղեկավարը։
Մաքմիլոնը կոչ է արել ամերիկացիներին՝ ապրանքները միանգամից չգնել, քանի որ դրա հետևանքով խանութներում պակասություն է առաջանում․ դրա փոխարեն նա առաջարկել է կանոնավոր կերպով, օրինակ՝ շաբաթական մեկ անգամ գնալ գնումների։
Նա նաև նշել է, որ սուպերմարկետներում ապրանքների՝ այդ թվում ախտահանող միջոցների մատակարարումները չեն դադարում։
Վերջին տեղեկությունների համաձայն՝ ԱՄՆ-ն շարունակում է գլխավորել նոր տեսակի կորոնավիրուսի վարակակիրների թվով ցուցակը։ Երկրում գրանցվել է նոր տեսակի կորոնավիրուսով վարակման ավելի քան 500 000 դեպք, որից 18 761-ը՝ մահվան ելքով։
