Մեծ Բրիտանիան մերժել է Թրամփի՝ Բորիս Ջոնսոնին COVID-19-ի բուժման հարցում օգնելու առաջարկը․ Business Insider
Մեծ Բրիտանիայի կառավարությունը մերժել է ԱՄՆ նախագահ Դոնալդ Թրամփի՝ Միացյալ Թագավորության վարչապետ Բորիս Ջոնսոնին COVID-19-ի բուժման հարցում օգնելու առաջարկը, գրում է Business Insieder-ը։
Ջոնսոնի մամուլի քարտուղարը երեկ մերժել է այս առաջարկը՝ ասելով, որ «ցանկացած բուժում իրականացվում է վարչապետի բժիշկների հսկողությամբ»։
«Մենք վստահ ենք, որ վարչապետը լավագույն բուժումն է ստանում Առողջապահության ազգային ծառայության կողմից։ Ցանկացած բուժում, որը նա ստանում է, իրականացվում է վերջինիս բժիշկների հսկողությամբ», - ասել է մամուլի քարտուղարը:
Նա նաև շնորհակալություն է հայտնել բարեմաղթանքների համար․ «Մենք շնորհակալ ենք բոլոր ջերմ բարեմաղթանքների համար, որոնք վարչապետը ստացել է գիշերվա ընթացքում»։
Երեկ ԱՄՆ նախագահ Դոնալդ Թրամփը հայտարարել էր, որ խնդրել է «ԱՄՆ առաջատար դեղագործական ընկերություններին» օգնել Մեծ Բրիտանիայի վարչապետ Բորիս Ջոնսոնին կորոնավիրուսից բուժելու հարցում։
«Մենք վշտացած ենք այն փաստով, որ նրան այսօր առավոտյան ինտենսիվ թերապիայի բաժանմունք են տեղափոխել։ Բոլոր ամերիկացիներն աղոթում են նրա համար։ Մենք կապվել ենք Բորիսի բոլոր բժիշկների հետ, տեսնենք՝ ինչ կլինի, բայց նրանք պատրաստ են սկսել»,- ասել էր ԱՄՆ նախագահը։
Ավելի վաղ հայտնի էր դարձել, որ Մեծ Բրիտանիայի վարչապետ Բորիս Ջոնսոնի վիճակը վատացել է, որից հետո նրան տեղափոխել են հիվանդանոցի ինտենսիվ թերապիայի բաժանմունք:
