ԱՄՆ հետախուզությունը կորոնավիրուսի համաճարակը կանխատեսել է դեռևս նոյեմբերին. ABC

Ամերիկյան հետախուզությունը չինական Ուհանում վարակի բռնկման մասին իմացել է դեռևս 2019 թվականի նոյեմբերին: Այս մասին ապրիլի 8-ին հայտնել Է ABC հեռուստաալիքը ՝ վկայակոչելով իր աղբյուրները:

ԱՄՆ-ի բժշկական հետախուզության ազգային կենտրոնի կողմից (NCMI) գաղտնազերծված զեկույցում ասվում է, որ չինական քաղաքում վարակ է տարածվում, որի պատճառով մարդիկ ստիպված են լինում փոխել սովորական կենսակերպը: Այն նաև ազդել է գործարար ակտիվության վրա: Նման եզրահանգումներ արվել են հավաքված տվյալների և արբանյակային լուսանկարների հիման վրա:

Զեկույցում նշվել է, որ վարակի բռնկումը կարող է աղետալի հետևանքներ ունենալ: Ընդ որում, ըստ հետախուզության տվյալների, Չինաստանի իշխանությունները թաքցրել են, որ համաճարակը դուրս է եկել վերահսկողությունից, իսկ չինացի բժիշկները, ըստ հրատարակության, իմացել են, որ գործ ունեն նոր հիվանդության հետ դեկտեմբերի վերջին միայն:

Զեկույցը, ինչպես ճշտել են ABC-ի աղբյուրները, իշխանություններին ներկայացվել է նոյեմբերի 26-ին: Խոսքը պաշտպանության նախարարության հետախուզական կոմիտեի, շտաբների պետերի միացյալ կոմիտեի և Սպիտակ տան մասին է: Դեկտեմբերին և հունվարին այդ թեման քննարկվել է ամերիկացի բարձրաստիճան պաշտոնյաների մասնակցությամբ կանոնավոր ճեպազրույցների ժամանակ: