Կառավարությունը հիմնականում զրոյացրել է գյուղատնտեսական վարկերի տոկոսները․ վարչապետ

Ուղիղ եթերում քաղաքացիների հարցերին պատասխանելու ժամանակ  Նիկոլ Փաշինյանը պատասխանեց օգտատերերից մեկի հարցին, որը պնդում էր, որ գյուղացիները չեն կարողանում գյուղատնտեսական աշխատանքները սկսել, քանի որ բանկերը վարկեր չեն տալիս։ Փաշինյանն ասաց, որ հիմա կառավարությունը հակաճգնաժամային քայլեր է իրականացնում նաև գյուղատնտեսության ոլորտում։

Փաշինյանի խոսքերով՝ կառավարությունը զրոյացրել է գյուղատնտեսական վարկերի տոկոսները, և նույնը վերաբերում է միկրովարկերին։ Նա նշեց, որ բանկերում էլ վարկ ստանալու հերթեր են, ու իրեն զեկուցել են, որ սոցիալական հեռավորությունը չի պահվում։

Վարչապետի խոսքերով՝ մինչև 1 մլն դրամով վարկեր են տրվում, և հենց վարկերի համար տրված գումարը սպառվի, կառավարությունը նոր միջոցներ կտրամադրի՝ վարկավորումներն իրականացնելու համար։

Սակայն մյուս կողմից, ըստ Փաշինյանի, իրականացվում են նաև այլ հակաճգնաժամային քայլեր, որոնք սուբսիդավորում են խելացի անասնագոմերի, կաթիլային ոռոգումով այգիների և գյուղատնտեսական այլ ենթակառուցվածքների ստեղծման համար։


 

Քաղաքականություն

Պատահարներ