Շատ կուզենամ, որ այս ընթացքում կորոնավիրուսով հիվանդացած եւ բուժված լինեմ եւ ես էլ գլխի ընկած չլինեմ, եւ կստացվի, որ ես իմունիտետ եմ ձեռք բերել կորոնավիրուսի նկատմամբ։ Այս մասին այսօր՝ մարտի 17–ին, ֆեյսբուքյան ուղիղ եթերում ասաց վարչապետ Նիկոլ Փաշինյանն՝ անդրադառնալով իր եւ առողջապահության նախարար Արսեն Թորոսյանի զրույցին։

«Այսօր մեր հիվանդների վիճակին նայելով, նախարարին ուղիղ հարց տվեցի, ասացի՝ պարոն Թորոսյան, կարող ե՞նք ենթադրել, որ այս ընթացքում բազմաթիվ մարդիկ հիվանդացել են կորոնավիրուսով եւ իրենք էլ չիմանալով առողջացել են, եւ ինքը պատասխանեց այո, կարող ենք այդպես ասել»,– ասաց Փաշինյանը, ապա հավելեց. «Մյուս կողմից էլ բնականաբար հատուկ չեմ գնա վարակվեմ, հիվանդանամ»։