Անձնագրային եւ վիզաների վարչություն դիմել խիստ անհրաժեշտության դեպքում եւ միայնակ. Ոստիկանություն
Հաշվի առնելով, որ առողջապահության ոլորտի պատասխանատուների կողմից տրվել են առողջության պահպանման հստակ ցուցումներ, այդ թվում՝ նաև մարդաշատ վայրերում գտնվելուց խուսափելը՝ կորոնավիրուսի հնարավոր տարածումը կանխելու համար՝ ՀՀ ոստիկանության անձնագրային եւ վիզաների վարչությունից խնդրում և հորդորում են․
1․ Անձնագրային և վիզաների վարչության, Ճանապարհային ոստիկանության վարչական մասի, ինչպես և այլ ստորաբաժանումների վարչական շենքեր այցելել միայն խիստ անհրաժեշտության դեպքում և միայնակ, առանց ուղեկցող կողմնակի անձանց։
2. Բացի անձնագիր ստանալու և ՀՀ քաղաքացիության դիմում ներկայացնելու դեպքերից, մյուս բոլոր գործողությունները հնարավոր է կատարել նաև լիազորված անձի միջոցով, հետևաբար մեկ անձը կարող է դիմել նաև այլ անձանց համար՝ հասարակ գրավոր լիազորագրի առկայությամբ, իսկ մինչև 16 տարեկան երեխայի համար ցանկացած անձնագրային գործողություն կատարվում է առանց երեխայի պարտադիր ներկայության: Հետևաբար անձնագրային ծառայություններ այցելելիս պետք է զերծ մնալ երեխաների հետ ներկայանալուց:
