Կկառուցվեն փոքր սպանդանոցներ. ՍԱՏՄ

Սննդամթերքի անվտանգության տեսչական մարմինը շարունակում է մարզային հանդիպումները սպանդանոցային գործով զբաղվելու ցանկություն հայտնող տնտեսավարողների հետ:

Այսօր հանդիպում էր կազմակերպվել ՍԱՏՄ ղեկավարի տեղակալ Արթուր Շատվորյանի եւ Արմավիրի մարզի Նորապատ գյուղում գառան մորթի կետեր ունեցող տնտեսավարողների միջեւ:

Քննարկվել են փոքր սպանդանոցներին ներկայացվող պահանջներն ու այն ուղիները, թե ինչպես կարող են ձեւափոխել արդեն գործող մորթի կետերը նորմալ, բոլոր նորմերին համապատասխանող սպանդանոցների, ստանալ թույլտվություն եւ հուլիսի 1-ին՝ սպանդանոցային մորթի պարտադիր պահանջին ընդառաջ, ունենալ օրինական տնտեսավարման հնարավորություն:

Արթուր Շատվորյանը վստահեցրել է, որ սպանդանոցների կառուցման համար արվող ներդրումները անհրաժեշտ են ու արդարացված, քանի որ ժամկետները այլեւս չեն կարող վերանայվել եւ հուլիսի 1-ից սպանդանոցային մորթի պարտադիր պահանջի կատարումը վերահսկելու ՍԱՏՄ գործառույթը կիրառվելու է ամբողջ գործիքակազմով:

Տեսչական մարմնի պատասխանատու պաշտոնյան եւ ՍԱՏՄ Արմավիրի մարզային կենտրոնի պետ Ալեքսան Մկրտչյանը նաեւ այցելել են Նորապատի գառան մորթի կետեր, ծանոթացել պայմաններին ու ընդլայնվելու հնարավորություններին: Արձնագրվել է, որ որոշ կետեր ձեւափոխումներից հետո կարող են համապատասխանել սպանդանոցներին ներկայացվող պահանջներին, իսկ մի քանիսը՝ ոչ: Տեղում քննարկվել է նաեւ իրար կողքի գտնվող մանր կետերի ուժերն ու ֆինանսական ռեսուրսները միավորելու միջոցով կոոպերատիվ հիմունքներով սպանդանոց կառուցելու հարցը: