Ուղղաթիռով Երևան տեղափոխված հղիի կյանքը փրկվել է

Ալավերդից Երևան` «Էրեբունի» ԲԿ հերթական բուժզննման գալու ճանապարհին 13 շաբաթական հղիի վիճակը կտրուկ վատացել էր: Հարազատները կապ էին հաստատել հղիությունը վարող բժշկի՝ «Էրեբունի» ԲԿ մանկաբարձ-գինեկոլոգ Նորայր Ղուկասյանի հետ. որոշվել էր հղիին անմիջապես տեղափոխել մոտակա բուժկենտրոն:

Մարզային բուժհաստատությունում առաջին բուժզննումից հետո ախտորոշվել էր առաջադիր ընկերքի վաղաժամ շերտազատում, արյունահոսություն և խնդիր էր դրվել կնոջն անմիջապես տեղափոխել երրորդ մակարդակի ծննդատուն, սակայն ճանապարհի երկարությունը կարող էր լուրջ խնդիրներ առաջացել ոչ միայն հղիությունը պահպանելու տեսանկյունից, այլև հղիի կյանքի համար, քանի որ կինն ուներ նաև առողջական խնդիրներ:

«Էրեբունի» ԲԿ-ի ռեանիմացիոն բրիգադը՝ Զինա Լսկավյանը և Արամ Վարդանյանն ուղղաթիռով անմիջապես մեկնել են Լոռի:

Տեղափոխման ընթացքում հղին ստացել է օքսիգենոթերապիա, ինֆուզիոն թերապիա, հսկվել են հեմոդինամիկ տվյալները: Թռիչքը տևել է 25 րոպե, հղին անմիջապես տեղափոխվել է «Էրեբունի» ԲԿ ծննդատուն:

«Էրեբունի» ԲԿ ծննդօգնության գծով փոխտնօրեն Անդրանիկ Պողոսյանի հետ քննարկման արդյունքում որոշվել է իրականացնել հղիությունը պահպանող թերապիա: Ծնվել է առողջ տղա երեխա:  

[e1049cc08c3fd27b247727ddd4e6002a.jpg]