«Արտաժան» սարից «ՈՒԱԶ»-ը մոտ 30 մետր գլորվել է. կա 2 զոհ 2 վիրավոր

Հայաստանի ԱԻՆ-ում, մարտի 8-ին, ժամը 17:57-ին Ճգնաժամային կառավարման ազգային կենտրոն տեղեկություն է ստացվել, որ Լոռու մարզի «Արտաժան» կոչվող սարալանջին տեղի է ունեցել ավտովթար, կան տուժածներ:

Դեպքի վայր է մեկնել ԱԻՆ ՓԾ մարզային փրկարարական վարչության հրշեջ-փրկարարական ջոկատից մեկ մարտական հաշվարկ:
Պարզվել է, որ «ՈՒԱԶ» մակնիշի ավտոմեքենան դուրս է եկել ավտոճանապարհի երթևեկելի հատվածից և «Արտաժան» կոչվող սարից մոտ 30 մ գլորվելով հայտնվել է ձորակում։

Վթարի հետեւանքով 1 հոգի տեղում մահացել է, 3 հոգի մամնական վնասվածքներով տեղափոխվել են Ալավերդու բժշկական կենտրոն: Վիրավորներին անտառից դուրս են բերել Արտակարգ իրավիճակների նախարարության Փրկարար ծառայության Ալավերդու թիվ 39 հրշեջ-փրկարարական ջոկատի փրկարարներն ու քաղաքացիները: Օպերատիվ են գործել նաեւ Ալավերդու հիվանդանոցի բժիշկները:

Shamshyan.com-ի հաղորդմամբ, մահացածը Վասիլի Մամաջանյանն է, իսկ վիրավորներն են՝ Արամ Սահակյանը, ով ոստիկանության նախկին սպա է, Արմեն Ղազարյանն ու Գալյա Ղազարյանը: Իսկ ավտոմեքենան հաշվառված է Ալավերդի քաղաքի «Սանահին» կայարանի բնակիչ, 47-ամյա Արման Ղազարյանի անվամբ:

Ավելի ուշ հայտնի է դարձել, որ հիվանդանոցում մահացե; է նաեւ Գալյա Ղազարյանը: