Հայտնաբերվել է տներ թալանողների խումբ

Վերջին ամիսներին ՀՀ ոստիկանության և Հայաստանի քննչական կոմիտեի մարզային վարչություններում ու տարածքային բաժիններում համատեղ օպերատիվ-հետախուզական և քննչական աշխատանքների արդյունքում բացահայտվել են բազմաթիվ բնակարանային գողություններ, այդ թվում՝ խմբակային։ Ինչպես հայտնում է shamshyan.com-ը, երեկ՝ մարտի 3-ին, Քննչական կոմիտեի Երևան քաղաքի քննչական վարչության Արաբկիրի քննչական բաժնում ՀՀ քր. օր-ի 177 հոդվածի 3-րդ մասի 1.1 կետի և նույն հոդվածի 2-րդ մասի հատկանիշներով հարուցված քրեական գործի շրջանակում ոստիկանության ծառայողների մասնակցությամբ դեպքի վայրի զննություն է կատարվել Կոտայքի մարզի Ներքին Պտղնի գյուղում։ 

 Ֆոտոլրագրողի տեղեկություններով՝ մի քանի բնակարանների ու տների գողութունների փաստով խմբի կազմում ընդգրկված կասկածյալը քննչական խմբին մատնացույց էր անում այն վայրը, որտեղից կատարել էր գողությունը։ 

Գ. Շամշյանի տեղեկություններով՝ նշված խումբը մոտ 10 գողություններ է կատարել Երևանի Էրեբունի և Արաբկիր վարչական շրջաններում, ինչպես նաև Կոտայքի մարզում։ Խմբի բոլոր անդամները ՀԿԳ ավագ քննիչ Տ. Միրզոյանի որոշմամբ ձերբակալվել են։ Հարուցված քրեական գործի նախաքննությունը շարունակվում է։