Մասսայական բախումներ Ղազախստանում․ 8 մարդ է զոհվել, կա 40 վիրավոր

Ղազախստանում մասսայական խոշոր բախումներ են եղել: Սոցկայքերում հայտնված տեսանյութում լսվում են կրակոցներ, երեւում է թե ինչպես այրվում տներ: Կան նաեւ զոհեր ու վիրավորներ: Արդեն հայտնի է, որ կա 8 զոհ եւ 40 վիրավոր: Ղազախստանի ոստիկանությունը 47 մարդ է ձերբակալել: 

Ղազախստանի նախագահ Քասըմ-Ժոմարտ Տոկաեւը հայտարարություն է արել՝ կապված Ժամբիլսկի շրջանում տեղի ունեցած իրադարձությունների հետ:

«Այս գիշեր Ժամբիլսկի շրջանի Կորդայսկի բնակավայրում բախումներ եւ խմբակային ծեծկռտուք է տեղի ունեցել տեղի բնակիչների միջեւ: Այդ իրավիճակից փորձել են օգտվել սադրիչները: Ցավոք, կան զոհեր եւ վիրավորներ: Խորին ցավակցություն եմ հայտնում զոհված քաղաքացիների հարազատներին եւ մտերիմներին: Շուտափույթ ապաքինում եմ մաղթում վիրավորներին»,- ասվում է հայտարարության մեջ:

Այժմ իրավիճակը վերահսկում են ոստիկանությունը եւ Ազգային գվարդիան: Տոկաեւը իրավապահներին հանձնարարել է միջոցներ ձեռնարկել այդ միջադեպի հետեւանքները վերացնելու համար:

Ավելի վաղ երկրի ՆԳ նախարար Եռլան Տուրգումբաեւը հայտնել է, որ Մասանչի գյուղի մոտակայքում մոտ 70 ագրեսիվ տրամադրված բնակիչներ են հավաքվել, որոնց միջեւ խմբակային ծեծկռտուք է սկսվել:

Մանրամասները՝ տեսանյութում: