Բանակն այն վիճակում է, որ կարողանում իր առաջ դրված խնդիրները կատարել, բայց եթե որևէ մեկը գտնում է, որ կարելի է դրանով բավարարվել և նոր սպառազինություն ձեռք չբերել, սխալվում է, բանակն անընդհատ արդիականացման անհրաժեշտություն ունի, և անընդհատ նոր սպառազինության անհրաժեշտություն առաջանալու է: Այս մասին այսօր լրագրողների հետ զրույցում ասաց ՊՆ ռազմական վերահսկողական ծառայության պետ Մովսես Հակոբյանը, գրում է tert.am-ը:

Դիտարկմանը, թե ՀՀ վարչապետ Նիկոլ Փաշինյանը վերջերս ասաց, որ 80-ականների զենքերի էջը փակված է, դա այդպե՞ս է, Մովսես Հակոբյանն ասաց. «Չեմ ուզում վարչապետի ասածները մեկնաբանել, 80-ականների զենքերը եղել են, կան և դեռ երկար ժամանակ լինելու են մեր բանակում, օգտագործվելու են, որովհետև դրանք լավագույն զենքերից են»:

Նա ասաց, որ այն զենքերը, որոնք արտադրվել են դեռևս 1967 թվականին, այսօր մեր բանակում, աշխարհում լավագույն զենքերից են: Ըստ նրա՝ դա վերաբերում է հատկապես AK ինքնաձիգին: