Մսավաճառներն ու անասնապահները բողոքի ակցիա են անում կառավարության դիմաց

Անասնապահները, մսավաճառները կրկին հավաքվել են կառավարության շենքի մոտ։ Պատճառը կառավարության որոշումն է վաճառվելիք մսի վերաբերյալ։ 

Այս տարվա հունվարի 15-ից ուժի մեջ է կառավարության որոշումը, ըստ որի՝ կենդանիների մորթը պետք է իրականացվի սպանդանոցներում, ու վաճառվող միսը պետք է ունենա սպանդանոցում մորթված լինելը հավաստող փաստաթուղթ։

Նշենք նաև, որ հունվարի 16-ին Սննդի անվտանգության տեսչական մարմինը մամուլի հաղորդագրություն էր տարածել, որ հանդիպում է եղել ՍԱՏՄ-ի և մոտ երեսուն սպանդանոցի ներկայացուցիչների միջև, քննարկում է եղել, և հուշագիր ստորագրվել։

Հուշագրի համաձայն՝ գյուղատնտեսական կենդանիների սպանդ իրականացնող տնտեսավարող սուբյեկտները պարտավորվել են՝

կենդանիների տերերից կենդանի  կենդանիների տեղափոխումը սպանդանոց և սպանդի արդյունքում ստացված կենդանական ծագման մթերքի տեղափոխումը՝ 3 գլուխ կենդանուց ոչ պակաս, սպանդանոցից մինչև 30 կմ շառավղով հեռավորության վրա իրականացնել անվճար, 1 գլուխ կենդանու դեպքում՝ 3000 ՀՀ դրամով, խոզերի սպանդն իրականացնել առավելագույնը 5000 ՀՀ դրամով, մանր եղջերավոր կենդանիներինը՝ առավելագույնը՝ 3500 ՀՀ դրամով, խոշոր եղջերավոր կենդանիներինը՝ առավելագույնը՝ 10000 ՀՀ դրամով:

Հունվարի 17-ին մսավաճառներից, անասնապահներից կազմված պատվիրակության անդամներից մեկը 2-րդ անգամ մսավաճառների՝ կառավարության մոտ հանրահավաքի ժամանակ լրագրողների հետ զրույցում ասել էր, որ  ՍԱՏՄ-ի հետ հանդիպում է եղել և քննարկման ժամանակ համաձայնության չեն եկել։ 

Ըստ նրա՝ ՍԱՏՄ-ի չէր ընդունել համայնքներում փոքր սպանդանոցներ կառուցելու համար գոնե 6 ամիս ժամանակի տրամադրման առաջարկը։