Ուրասարում մտավախություն կա, որ հրդեհը կարող է տարածվել դեպի շրջակա անտառները
Լոռու մարզի Ուրասար համայնքում անհանգստացած են, որ խոտածածկ տարածքում առաջացած հրդեհը կարող է տարածվել դեպի շրջակա անտառները։
Համայնքից NEWS.am–ին հայտնել են, որ կրակը սկսվել է Շիրակից, շարունակվել է դեպի Սպիտակ, ապա հասել Ուրասար և Կաթնաղբյուր բնակավայրեր։ Նրանց խոսքով՝ «հրդեհը վերահսկելի է, մտահոգությունն այն է, որ անտառներին չմոտենա»։ Ներկայում մեծ թվով փրկարարներ, էկոպարեկներ, զինծառայողներ, տեղացիներ և կամավորներ աշխատում են հրդեհը մարելու ուղղությամբ։
Հիշեցնենք` ՆԳՆ փրկարար ծառայությունը հայտնել էր, որ նոյեմբերի 29-ին՝ ժամը 18:59-ին, տեղեկություն է ստացվել Ուրասար և Կաթնաղբյուրի միջակայքում նկատված ծուխի մասին, և պարզվել է, որ այրվում է խոտածածկ տարածք։
Նոյեմբերի 30-ին հրդեհաշիջման աշխատանքներին ներգրավված են մեծ թվով փրկարարական ուժեր, էկոպարեկներ, «Լոռե» ջոկատի կամավորներ և բնակիչներ։
