«Իմ քայլը» խմբակցության փակ հանդիպման ավարտից հետո լրագրողների հարցերին պատասխանեց ԱԳ նախարար Զոհրաբ Մնացականյանը: Նա չմանրամասնեց հանդիպման օրակարգը և հայտնեց, որ  քննարկվել են արտաքին  քաղաքականության արդյունավետության բարձրացմանը վերաբերող հարցեր:

«Բավականին բարձր եմ գնահատում խմբակցության հետ այսօրինակ հանդիպումները: Այսկերպ ավելի ամրապնդում, ուժեղացնում ենք արտաքին քաղաքականության իրականացման աշխատանքի արդյունավետությունը, և այս գործում պառլամենտական հատվածն ունի կարևոր մաս»,- ասաց նախարարը:

Հարցին` գերիների փոխանակման վերաբերյալ ի՞նչ նորություն կան, Մնացականյանը պատասխանեց, որ այդ ուղղությամբ գործընթացը շարունակվում  է.

«Այս թեման չափազանց զգայուն է, վատ եմ զգում ստեղծված իրավիճակի համար, բայց դեռևս այս պահին, դժբախտաբար ավելին ասելու բան չունեմ, գործընթացը շարունակվում է»:

Լրագրողները Մնացականյանից հետաքրքրվեցին, թե արդյոք Ռուսաստանում կառավարության փոփոխությունն ինչ-որ կերպ կարող է անդրադառնալ հայ-ռուսական հարաբերությունների վրա, նախարարը պատասխանեց.

«Հայ-ռուսական հարաբերություններն ունեն բավականին ամուր հիմքեր և բավականին հարուստ օրակարգ: Այդ հարուստ օրակարգի բոլոր ձևարափերի մեջ մեր աշխատանքները շատ էֆեկտիվ են ու ակտիվ, աշխատում ենք, ինչպես որ աշխատում ենք»:

Զոհրաբ Մնացականյանը, ևս մեկ անգամ անդրադառնալով իր և Ադրբեջանի իր գործընկերոջ հանդիպմանը վերաբերող հարցին, նշեց, որ հայկական կողմը չի խուսափում, և բնականաբար բանակցային գործընթացը անհրաժեշտ է շարունակել:

«Մենք միշտ շարունակելու ենք ներգրավված լինել և աշխատել: Այդ կոնտեքստում, այդ տրամաբանության մեջ երբ որ կհամաձայնենցնենք անհրաժեշտ բոլոր մանրամասները հանդիպման հետ կապված, կհայտարարենք»,- ասաց Զոհրաբ Մնացականյանը:

Հավելենք, որ «Իմ քայլը» խմբակցությունն առաջիկայում այսօրինակ  հանդիպում կունենա նաև ոստիկանապետի պաշտոնակատարի հետ: