Բոլոր ձեռնարկությունները պետք է ներկայացնեն իրենց իրական տերերին, այդ թվում ԶԼՄ-ները. վարչապետ

ՀՀ վարչապետ Նիկոլ Փաշինյանը կառավարության այսօրվա նիստում հայտարարեց, որ բոլոր ձեռնարկությունները պետք է ներկայացնեն իրենց իրական տերերին։« Դա վերաբերում է ոչ միայն սովորական բիզնեսին, այլև ԶԼՄ–ներին»-, ավելացրեց նա։

«Եթե որևէ մեկին մեղադրանք են առաջադրել, որոշ ալիքներում դուք երաշխավորված կտեսնեք, որ մեղադրյալն այնտեղ նստած է և էմոցիոնալ բացատրում է հանդիսատեսին, թե որտեղ պետք է ձմեռեն խեցգետինները։ Ինչ–որ տեղ դա նույնիսկ լավ է. մենք հասկանում ենք, թե որտեղ է կոռուպցիա մնացել և ով է դրա հետևում կանգնած»,- ասաց նա։

Վարչապետի խոսքով` ընդհանուր առմամբ, ցանկացած գործարարի առնչվող այս տեղեկությունը, պետք է հասանելի լինի պետությանը ճիշտ հարկման նպատակով։

Ինչպես նշեց արդարադատության նախարար Ռուստամ Բադասյանը,  առաջին փուլում սեփականատերերին բացահայտելու մասին պահանջներ է սահմանվել հանքարդյունաբերական ընկերությունների համար. նրանք պետք է բացահայտեն բոլոր կոնկրետ ֆիզիկական անձանց, որոնք այդ ընկերության 10% և ավելի բաժնետոմսերի սեփականատեր են։

«Այժմ մենք ուզում ենք միասնական ստանդարտ մշակել բոլոր ձեռնարկություններում սեփականատերերի բացահայտման համար», – նշեց նախարարը։

Նշենք, որ հանքարդյունաբերական ընկերությունների բաժնետերերի  (10% և ավելի բաժնետոմսերի սեփականատերի) բացահայտման մասին պահանջը Հայաստանում ուժի մեջ կմտնի հունվարի 30-ից։ Ընդ որում, անհրաժեշտ կլինի նշել ոչ միայն ընկերությունները, այլև դրանց հետևում կանգնած ֆիզիկական անձանց։ Հայաստանն այս օրենքն ընդունել է` դառնալով Արդյունահանող ճյուղերի թափանցիկության միջազգային նախաձեռնության (EITI) անդամ։