Ինֆորմատիկայի քոլեջում ուսանողները վիճաբանել են. 16-ամյա տղան մարմնական վնասվածքներով տեղափոխվել է հիվանդանոց

Ոստիկանության Արաբկիրի բաժնի հետաքննչական բաժանմունքում նյութեր են նախապատրաստվում երեկ՝ դեկտեմբերի 19-ին, Երևանում տեղի ունեցած վիճաբանության փաստով։ 

Ժամը 17։50-ի սահմաններում «Սուրբ Աստվածամայր» բժշկական կենտրոնից ոստիկանության Արաբկիրի բաժին ահազանգ է ստացվել, որ «քթի վնասվածք» ախտորոշմամբ իրենց մոտ է տեղափոխվել մի տղա։ Ինչպես հայտնում է ֆոտոլրագրող Գագիկ Շամշյանը, հիվանդանոց են մեկնել ոստիկանության Արաբկիրի բաժնի օպերատիվ խումբը՝ անչափահասների գործերով բաժանմունքի տեսուչի գլխավորությամբ։

Ոստիկանները պարզել են, որ վիրավորը Երևան քաղաքի բնակիչ՝ 16-ամյա Դմիտրի Ս-ն է, ով սովորում է Արաբկիր վարչական շրջանի Ինֆորմատիկայի Պետական Քոլեջում։ Ոստիկանները պարզել են նաև, որ նա հիվանդանոց է տեղափոխվել Մամիկոնյանց փողոցի 52 հասցեում գտնվող նշված քոլեջից։ 

Մինչ բժիշկներն օգնություն էին ցուցաբերում երեխային, Արաբկիրի ոստիկանները՝ բաժնի պետ Արմեն Վաթյանի գլխավորությամբ պարզել են, որ նույն օրը, ժամը 11։30-ի սահմաններում նշված քոլեջի լսարաններից մեկում վիճաբանություն է տեղի ունեցել Դմիտրի Ս-ի և նրա հասակակից՝ Արմավիրի մարզի բնակիչ Արմեն Ս-ի միջև, որի ժամանակ էլ վերջինս ձեռքով և ոտքով հարվածներ է հասցրել Դմիտրի Ս-ի մարմնի տարբեր մասերին։

Հետաքննիչի որոշմամբ նշանակվել է դատաբժշկական փորձաքննություն։