Զինվորական կոմիսարիատի փլուզման հետևանքով տուժածները զորակոչիկներ ու զորակոչիկների ծնողներ են․ ՊՆ խոսնակ

Տուժածները զորակոչիկներ ու զորակոչիկների ծնողներ են։ Այս մասին քիչ առաջ Auroranews-ի հետ զրույցում ասաց ՀՀ ՊՆ մամուլի խոսնակ Արծրուն Հովհաննիսյանը՝ անդրադառնալով Երևանի Հալաբյան 19ա հասցեում գտնվող N1 Զինվորական կոմիսարիատի երկհարկանի շենքում տեղի է ունեցած փլուզմանը։

Հովհաննիսյանը նշեց, որ տուժածներին տեղափոխել են տարբեր բժշկական հաստատություններ․ «Լուրջ վնասվածքենր չունեն, կասկած կա, որ մեկի ոտքն է կոտրված»։ 

Հետաքրքրվեցինք, թե որն է փլուզման պատճառը, ասաց․ «Հին շենք է, շատ մարդ է հավաքվել, որ դրսում չմրսեն, հավանաբար դա է պատճառը»։ 

Հիշեցնենք՝ քիչ առաջ հայտնել էինք, որ Հայաստանի ԱԻՆ-ում, այսօր՝ դեկտեմբերի 19-ին, ժամը 15:35-ին «911» ծառայություն ահազանգ է ստացվել, որ Երևանի Հալաբյան 19ա հասցեում գտնվող N1 Զինվորական կոմիսարիատի երկհարկանի շենքում տեղի է ունեցել փլուզում. կա տուժած, անհրաժեշտ է փրկարարների օգնությունը:

Դեպքի վայր են մեկնել ԱԻՆ ՓԾ փրկարարական ուժերի վարչության հատուկ նշանակության փրկարարական աշխատանքների իրականացման կենտրոնի փրկարարական ջոկատները, Երևան քաղաքի փրկարարական վարչության հրշեջ-փրկարարական ջոկատից երկու մարտական հաշվարկ, Ճգնաժամային կառավարման ազգային կենտրոնի օպերատիվ և արձագանքման խմբերը, հոգեբանական աջակցության բաժնի հոգեբանական խորհրդատվության գծով հրահանգիչը և Աղետների բժշկության կենտրոնի հերթապահ բժիշկը:

Պարզվել է, որ փլուզվել է 1-ին հարկի սենյակներից մեկի հատակը (մոտ 25 քմ): Կա 11 տուժած: