Հրազդանի բնակչին առանձնակի դաժանությամբ սպանողը ազգությամբ թուրք է
SHAMSHYAN.com-ի տեղեկություններով՝ քիչ առաջ ոստիկանության Կոտայքի մարզային վարչությունը, համագործակցելով Հայաստանի քննչական կոմիտեի Կոտայքի մարզային քննչական վարչության քննիչների հետ, տաք հետքերով բացահայտել են Հրազդան քաղաքում առանձնակի դաժանությամբ 51-ամյա Ռոբերտ Հախվերդյանի սպանությունը։
Ինչպես հայտնում է աղբյուրը, նշված սպանությունը կատարելու կասկածանքով Հրազդանի ոստիկանություն են բերման ենթարկել Հրազդան քաղաքի Միկրոշրջան թաղամասի բնակիչ՝ 41-ամյա Գարսիմով Աղամամադիին։
Աղբյուրի տեղեկություններով՝ կասկածյալն ազգությամբ թուրք է․ նա ձերբակալվել է։
Ինչպես ավելի վաղ հայտնել էր աղբյուրը, այսօր՝ դեկտեմբերի 19-ին, առանձնակի դաժանությամբ սպանություն էր տեղի ունեցել Կոտայքի մարզում:
Ոստիկաններն ու քննիչները իր բնակարանի հյուրասենյակում հայտնաբերել էին 51–ամյա Ռոբերտ Հախվերդյանի դին, իսկ նշված սենյակում խառնաշփոթ վիճակ էր տիրում:
Դատաբժշկի նախնական եզրակացության համաձայն՝ գլխի և մարմնի տարբեր մասերում կային հարվածի հետքեր:
Փաստի առթիվ ստեղծվել էր քննչական խումբ, որտեղ հարուցվել էր քրեական գործ՝ ՀՀ քր օր-ի 104 հոդվածի 1-ին մասի հատկանիշներով։
