Աղջիկան հենց ծննդատնից վաճառել են երկար տարիներ երեխա չունեցող ամուսիններին․ Aravot.am

Հանրապետական կլինիկական ծննդատանը 1988 թվականին ծնված Լ.Մ.-ն հենց ծննդատնից վաճառվել է երկար տարիներ երեխա չունեցող ամուսիններին:  Երեխայի կենսաբանական մորն ասել են՝ երեխան մահացած է ծնվել: Այս մասին Aravot.am-ին պատմել է Լ. Մ.-ի հորեղբոր որդին: Ըստ նրա՝1988-ին Ռազմիկ Աբրահամյանը հանրապետական ծննդատան գլխավոր բժիշկն է եղել:

 «Լ. Մ.-ի կենսաբանական մորն ասել են, որ իր երեխան մահացած է ծնվել, այդ կինն արդեն չորս աղջիկ ուներ, Լ. Մ.-ն նրա 5-րդ աղջիկն էր, ամուսինը չէր ցանկանում 5-րդ աղջկան. այդ կնոջ ամուսինը, սկեսուր, սկեսրայրը չեն ցանկացել այդ երեխային եւ ծննդատան բժիշկներին  ասել են՝ կասեք՝ երեխան մահացած է  ծնվել, այդպես էլ արել են»,-  լրատվականի հետ զրույցում ասել է Հարութ Ֆարիսյանը:
 

Aravot-ի զրուցակցի խոսքով, իր հորեղբոր կինը հանրապետական ծննդատանը ձեւակերպվել է որպես հղի, փաստաթղթերով ձեւակերպել են ծննդաբերություն. «Ապրանք չէին գնում էլի խանութից, ի վերջո, երեխա էր, ոնց եք պատկերացնում, որ ծննդատան գլխավոր բժիշկը տեղյակ չլիներ այդ ամենից: Հորեղբորս  կինը այն ժամանակ պառկում է հիվանդանոց, ձեւակերպում են, որ հղի է, այնպես են ներկայացնում, որ Լ. Մ.-ն հորեղբորս  կնոջ երեխան է, փաստաթղթերով  ամեն ինչով ու այդ ամենը գումարով, միայն չեմ կարող ասել՝ ինչքան գումար են վճարել երեխայի համար»: 

 Հիշեցնենք՝ ավելի վաղ հայտնել էինք, որ մի խումբ անձանց կողմից նախնական համաձայնությամբ, ծնողներից երեխային ապօրինի բաժանելու կասկածանքով ձերբակալվել է «Վերարտադրողական առողջության, պերինատոլոգիայի, մանկաբարձության և գինեկոլոգիայի հանրապետական ինստիտուտ» ընկերության տնօրեն Ռազմիկ Աբրահամյանը: