«Փաստ». Հայաստանը տեխնոլոգիական կետրոն դարձնելու համար տարեկան 1,3 մլրդ դրամ կպահանջվի

«Փաստ» օրաթերթը գրում է. 

Բարձր տեխնոլոգիական արդյունաբերության նախարարությունն իրավական ակտերի նախագծերի քննարկման միասնական կայքում ներկայացրել է «Հայկական վիրտուալ կամուրջ» ծրագիրը հաստատելու մասին նախագիծը:

Դրա հիմնավորման մեջ նշվում է, որ որոշման նախագծի ընդունումը պայմանավորված է ՀՀ կառավարության 2019 թվականի փետրվարի 8-ի «ՀՀ կառավարության ծրագրի մասին» N 65-Ա որոշման 7.1 կետով, համաձայն որի, կառավարությունը նպատակադրվել է Հայաստանը դարձնել բարձր տեխնոլոգիական, արդյունաբերական երկիր, որին հասնելու և բարձր տեխնոլոգիաների զարգացումն ապահովելու համար իրականացվող քայլերից է «Հայկական վիրտուալ կամուրջ» ծրագրի մշակումն ու իրագործումը: 

Այն հնարավորություն կտա, օգտագործելով հայկական գիտական միտքը և հնարավորությունները, տեխնոլոգիական և սփյուռքի ներուժը, ընդլայնել համաշխարհային տեխնոհսկաների հետ գործակցության աշխարհագրությունն ու հնարավորությունները: 

Ծրագրի մեկնարկը նախատեսվում է 2020 թվականից, որի համար պետբյուջեով յուրաքանչյուր տարի կհատկացվի 1,3 մլրդ դրամ: 

Նախարարության ներկայացրած հավելվածում նշվում է` ծրագիրն իր տեսակով առաջինն է և խոշորագույնը, որն անմիջականորեն իրականացվելու է Սփյուռքի տեխնոհամայնքի և Հայկական բարեգործական ընդհանուր միության հետ միասին։ 

Այն հայկական ստարտափ ընկերություններին ու ձեռներեցներին հնարավորություն կտա պետական աջակցությամբ և հատուկ մշակված օրակարգով այցելել Սիլիկոնյան հովիտ, մասնակցել կատարելագործման ծրագրերին։ 

Առավել մանրամասն թերթի այսօրվա համարում