Չեմ ուզում քննարկել նման սցենար. ՊՆ փոխնախարարը՝ արագացված զինվորական ծառայության նախագծի մասին

«Իմ քայլը» խմբակցության պատգամավոր Հայկ Սարգսյանի առաջարկած օրինագիծը մեծ իրարանցում է առաջացրել հանրության շրջանում: Օրինագիծն արագացված զինվորական ծառայության մասին է, ըստ որի՝ քաղաքացին, եթե խուսափել է զինվորական ծառայությունից և գտնվում է արտերկրում, կարող է վերադառնալ հայրենիք մինչև 27 տարեկանը, վճարել 10 մլն դրամ և արագացված կերպով՝ 1 ամսում, սովորել որոշ բանակային հմտություններ:

Սարգսյանի պնդմամբ՝ սա արտագաղթի դեմ պայքարի միջոց է, նաև խթան՝ հզորացնելու Հայոց բանակը:

Այսօր ճեպազրույցի շրջանակներում Հայկ Սարգսյանը նշեց, որ նախագիծն առայժմ խմբակցությունում չի քննարկվել, սակայն եղել են պատգամավորներ, ովքեր մոտեցել են նրան և ողջունել օրինագիծը:

«Իմ քայլը» խմբակցության պետական-իրավական հանձնաժողովի պատգամավոր Արթուր Դավթյանը «Հայկական Ժամանակ»-ի հետ զրույցում ասել է, որ նախագիծն ունի և՛ լավ, և՛ վատ կողմեր:

Պատգամավորի կարծիքով՝ առաջնայինը Պաշտպանության նախարարության եզրակացությունն ու դիրքորոշումն է, բայց, ըստ նրա, լավ կողմերից մեկն այն է, որ այս նախագծի շնորհիվ շատերը գուցե չլքեն Հայաստանը: Մյուս դրական կողմը, որ կունենանք վարձատրվող զինծառայողներ, ինչի հաշվին էլ գուցե շատ տղամարդիկ կգան «խոպանից» ու կլինեն իրենց ընտանիքների կողքին: Մյուս լավ կողմը, ըստ Դավթյանի, այն է, որ տղաներն այս նախագծի արդյունքում գոնե որոշ չափով տեղյակ կլինեն բանակից և կունենան զինգրքույկ:

Վատ կողմերից Դավթյանն առանձնացրեց գումարի քիչ լինելը: Ըստ Դավթյանի՝ 10 մլն դրամը քիչ է, պետք է լինի առնվազն 20 մլն դրամ, քանի որ գումարի քչության պատճառով «առիթից օգտվողները» շատ կլինեն, վճարովի զինծառայող ունենալու համար էլ սա շատ քիչ է:

Հարցին, թե արդյոք այստեղ չկան կոռուպցիոն ռիսկեր, Դավթյանը բացասական պատասխան տվեց՝ նշելով, որ սա ամբողջությամբ պետական վճար է լինելու:

Ինչ վերաբերում է նախագծին կողմ կամ դեմ քվեարկելուն, Դավթյանը նշեց, որ գումարի շեմը պետք է բարձրանա, և եթե վճարը կազմի գոնե 20 մլն դրամ, ապա նա, ամենայն հավանականությամբ, կողմ կքվեարկի նախագծին:

ՊՆ փոխնախարար Գաբրիել Բալայանն ԱԺ-ում՝ լրագրողների հետ ճեպազրույցում, ասաց, որ այս նախագծի շուրջ ՊՆ-ում կա բացասական դիրքորոշում:

Բացի այն, որ այս նախագիծը չպետք է ընդունվի, փոխնախարարի պնդմամբ՝ ներկայիս գործող օրենքը նույնպես չպետք է երկարացվի: Ըստ այժմյան գործող օրենքի՝ քաղաքացին կարող է խուսափել զինվորական ծառայությունից, վերադառնալ Հայաստան 27 տարեկանը լրանալուց հետո, վճարել 3.6 մլն դրամ և ազատվել քրեական պատասխանատվությունից:

«Զինվորական ծառայության հիմքը Սահմանադրությունն է, որտեղ գրված է, որ ցանկացած քաղաքացի պարտավոր է մասնակցել ՀՀ սահմանների պաշտպանությանը»,- ասաց Բալայանը՝ հավելելով, որ զինծառայության չանցնելու հիմքերը ևս օրենքով սահմանված են:

Անդրադառնալով մեկամսյա զինվորական ծառայությանը՝ փոխնախարարը նշեց, որ առնվազն 5 ամիս է տևում ուսումնական փուլը, և նրանք չեն կարող դիտարկել այդ փուլի կրճատ տարբերակը: Ամեն դեպքում, ինչպես նշեց Բալայանը, սա նրա կարծիքն է, և գուցե կա միջազգային փորձ, որի վրա հիմնվել է պատգամավոր Հայկ Սարգսյանը օրինագիծը գրելիս:

Հարցին, թե արդյոք բանակը պատրաստ է նման փոփոխության, եթե օրենքն ընդունվի, պաշտպանության փոխնախարարն ասաց, որ չի ուզում քննարկել նման սցենար, բայց, այնուամենայնիվ, ՊՆ-ն իրականացնում է օրենքով սահմանված լիազորություններ, և կրում են այն պարտականությունները, որոնք օրենքով սահմանված են: