Էջմիածնում աղմկահարույց կրակոցների գործով կալանավորվել է BMW-ի վարորդը

SHAMSHYAN.com-ի տեղեկություններով՝ նոյեմբերի 26-ին Հայաստանի քննչական կոմիտեի Արմավիրի մարզային քննչական վարչության քննիչը միջնորդություն է ներկայացրել Արմավիրի մարզի ընդհանուր իրավասության դատարան, որպեսզի դատարանը երկամսյա կալանքի որոշում կայացնի Էջմիածին քաղաքի բնակիչ, 25-ամյա Արգիշտի Այվազյանի նկատմամբ:

Ինչպես հայտնում է աղբյուրը, վերջինիս նկատմամբ քրեական գործ է հարուցվել ՀՀ քր օր-ի 34-38-104 հոդվածների հատկանիշներով:

Դատարանը դռնփակ դատական նիստն անցկացնելուց և խորհրդակցական սենյակից վերադառնալով՝ բավարարել է քննչական մարմնի միջնորդությունը և Ա. Այվազյանը դատարանից տեղափոխվել է «Արմավիր» քրեակատարողական հիմնարկ:

Վերջինս կասկածվում է նոյեմբերի 14-ին Էջմիածին քաղաքի բնակիչ, 27-ամյա Գուրգեն Առաքելյանի նկատմամբ սպանության փորձին մասնակից լինելու մեջ:

Աղբյուրի տեղեկություններով՝ Արմավիրի մարզի ոստիկանների ու քննիչների կողմից հայտնաբերված BMW-ն պատկանում է Ա. Այվազյանին: