Ստամբուլից Երևան այսօր նախատեսված թռիչքը չի կայացել. Ըստ տեղեկությունների թուրքական «Atlas Global» ավիաընկերությունը հայտարարություն է տարածել՝ տեղեկացնելով բոլոր ուղղություններով չվերթները դադարեցնելու մասին, այդ թվում` Ստամբուլ-Երևան-Ստամբուլ ուղղությամբ։

Չվերթները դադարեցվել են նոյեմբերի 26-ից մինչև դեկտեմբերի 21-ը՝ Թուրքիայում 2016-ից սկսված տնտեսական վայրիվերումների ու դրա պատճառով ընկերության կրած կորուստների պատճառով:

Դրան գումարվել են նաև Ստամբուլի նորաբաց օդանավակայանի թանկ ծախսերը, ինչի հետևանքով ընկերությունը ստիպված է եղել ֆինանսական խնդիրների լուծման համար ժամանակավորապես դադարեցնել չվերթները: Նախօրոք գնված տոմսերի վերադարձի կամ ամսաթվերի փոփոխության համար դեկտեմբերի 16-ին հատուկ ուղեցույց կտեղադրվի ընկերության կայքում:

Մինչ այդ փակ կլինեն նաև ընկերության տոմսերն ամրագրելու բոլոր համակարգերը: Այսօր պարզ է դարձել, որ փակ է Ստամբուլ-Երևան-Ստամբուլ ուղիղ չվերթներ իրականացնող «Ատլաս գլոբալ» ավիաընկերության Երևանի գրասենյակը։