Միայն այս օրենքով չեք կարող լուծել խնդիրը. պատգամավորը՝ քրեական ենթամշակույթին առնչվող օրենքի մասին
«Երբ ասում են՝ միայն այս օրենքով չեք կարող լուծել խնդիրը, տպավորություն է ստեղծվում՝ պնդում է եղել, որ միայն դրանով է լուծվելու: Մինչդեռ այդպիսի բան չի եղել: Հավակնություն չի եղել, որ կընդունենք օրենք, և երևույթն իսպառ կվերանա»,- ԱԺ-ում ճեպազրույցի ժամանակ պարզաբանեց «Իմ քայլ»-ից Սուրեն Գրիգորյանը` անդրադառնալով քրեական ենթամշակույթին առնչվող օրենքին:
Ի պատասխան դիտարկումների` պատգամավորն ընդգծեց, որ վերոնշյալ օրենքը ոչ թե հետևանքի, այլ պատճառի, քրեածին տարրեր ծնող երևույթի դեմ պայքար է:
Նա որոշ դրվագներ հիշեցրեց նախկին ժամանակներում քրեական հեղինակությունների հետ հանդիպումներից.
«Իշխանության ներկայացուցիչները հաճախ հանդիպում էին ընդհանուր խնջույքների ժամանակ: Տեսահոլովակները բոլորս հիշում ենք՝ կային քրեական հեղինակություններ, բոլորը գիտեն, որ այդպիսի կարգավիճակ ունեն: Եթե պետությունը թույլ է և նման վարքագիծ է դրսևորում, պետք չէ զարմանալ, որ նման երևույթներ կարող են առաջ գալ»:
Արսեն Բաբայանի կալանքի խափանման միջոցը փոխելու համար պատգամավոր Սիսակ Գաբրիելյանի երաշխավորության հարցը Սուրեն Գրիգորյանն այսպես մեկնաբանեց.
«Դա չի նշանակում, որ Գաբրիելյանը դրական է վերաբերում պարոն Բաբայանի կատարած կամ ենթադրաբար կատարած արարքներին»:
Պատգամավորը հորդորեց թացը չորից տարբերել, բայց նաև ընդգծեց, որ չի ասում, թե Բաբայանը քրեական հեղինակություն է՝ խոսքն այլ բանի մասին է: Իսկ Սասուն Միքայելյանը, պատգամավորի խոսքերով, գտել է, որ քրեական հեղինակություն հանդիսացող անձի ազատազրկման հիմքեր չկան և քննության նպատակներից չի բխում, որ կոնկրետ անձը գտնվի ազատության մեջ: Ահա թե ինչու է ներկայացել անձնական երաշխավոր.
