Առաջարկվում է, որ այսուհետ ավագանու անդամները ևս հայտարարագրեր ներկայացնեն
ՀՀ արդարադատության նախարարությունը հանրային քննարկման է ներկայացրել «Հանրային ծառայության մասին» օրենքում փոփոխություններ եւ լրացումներ կատարելու մասին» ՀՀ օրենքի եւ «Հայաստանի Հանրապետության ընտրական օրենսգիրք» Հայաստանի Հանրապետության սահմանադրական օրենքում փոփոխություն կատարելու մասին» ՀՀ սահմանադրական օրենքի նախագծերը:
Նախարարությունը նշել է, որ տեղական ինքնակառավարման մարմիններում պաշտոնատար անձանց որոշակի շրջանակ, մասնավորապես համայնքի ավագանու անդամները եւ աշխատակազմերի քարտուղարներն ազատված են հայտարարագրման պարտականությունից: Նշված պաշտոնատար անձանց գործունեության արդյունքում կարող են առաջանալ հնարավոր շահերի բախման կամ այլ իրավիճակներ, ուստի նման ռիսկերը վերահսկելի դարձնելու համար նախարարությունն անհրաժեշտ է համարում ընդլայնել հայտարարատուների շրջանակը՝ ներառելով նաեւ վերոնշյալ պաշտոնատար անձանց:
Նախագծով վերանայվել է հայտարարատու պաշտոնատար անձանց ցանկը: Առաջարկվում է հայտարարագրման պարտականություն նախատեսել 15 հազար եւ ավելի բնակչություն ունեցող համայնքների ավագանու անդամների եւ աշխատակազմի քարտուղարների համար:
Հայտարարագրերը պետք է ներկայացվեն նորաստեղծ Կոռուպցիայի կանխարգելման հանձնաժողովին: Բացի դրանից, գույքի հայտարարագրման ժամանակ նախագծով հայտարարատուի վրա դրվում է պարտավորություն՝ ներկայացնել նաեւ արտասահմանում գտնվող գույքի վերաբերյալ տեղեկատվություն: Առաջարկվում է նաեւ նվազեցնել օրենքով սահմանված թանկարժեք գույքի դրամական շեմը, որն այս պահին կազմումը է 8 մլն դրամ:
Նախարարությունը կարծում է, որ լիազոր մարմնի կողմից ստացված տեղեկատվությունը բավարար չէ պաշտոնատար անձի գույքային դրության մասին ամբողջական պատկերացում ձեւավորելու համար: Առաջարկվում է ներդնել ծախսերի հայտարարագրման ինստիտուտ: Նաեւ առաջարկվում է սահմանել հայտարարագրման ենթակա ծախսերի տեսակները եւ ծախսերի վերաբերյալ ներկայացվող տեղեկատվության շրջանակը:
Դրա շնորհիվ լիազոր մարմինը հնարավորություն կունենա ստանալու ամբողջական տեղեկատվություն հայտարարատու պաշտոնատար անձի գույքային դրության վերաբերյալ եւ կնպաստի հնարավոր խախտումների բացահայտմանը:
