Պետք չէ այլ բաներ փնտրել. Քոչարյանը` Մովսես Հակոբյանի պաշտոնանկության մասին

ՀՀ ԱԺ «Իմ քայլը» խմբակցության պատգամավոր, խորհրդարանի պաշտպանության և անվտանգության հանձնաժողովի նախագահ Անդրանիկ Քոչարյանը չի գնահատում գլխավոր ռազմական տեսուչ Մովսես Հակոբյանի աշխատանքը: 

Նրա աշխատանքից ազատելն էլ չի կապում խորհրդարան գնալու հետ, ասում է` միգուցե  Մովսես Հակոբյանն է դիմում գրել:

Լրագրողի դատարկմանը, թե պաշտոնանկությունից հետո այլեւս չեն կարող նրան հրավիրել  Ապրիլյանի  հանձնաժողովին, Քոչարյանը նկատեց, որ իրենք ոչ մեկին էլ չեն պարտադրում, ում էլ որ հրավիրում են, հաճույքով են գալիս:

«Պետք չէ այլ բաներ փնտրել, հետեւեք պաշտոնական տեղեկատվությանը»,-ասաց նա:

Լրագրողի դիտարկմանը, թե Մովսես Հակոբյանը նախկին իշխանության հետ էր ասոցացվում, Անդրանիկ Քոչարյանը նկատեց, որ զինվորականությունը ընդհանրապես իր ծառայությունները մատուցել է բոլոր իշխանությունների ժամանակ. «Ուրիշ բան, որ տաբեր ժամանակաշրջանում, մեր զինվորականության նկատմամբ մի քիչ այլ վերաբերմունք է եղել, որովհետեւ  եղել է նաեւ իշխանություն, որը որ մեր բանակին հասցրել է մեծ վնաս, նրանց օգտագործելով նրանց ներքաղաքական խնդիրների մեջ, ինչպես որ եղել է Մարտի 1-ը: Նորից եմ ասում` մեր բանակը պետք է զերծ մնա նման օգտագործման հնարավորությունից եւ այսօրվա իշխանությունները բացառում են նման բան երբևիցե»:

Նշենք, որ  այսօր ՀՀ վարչապետ Նիկոլ Փաշինյանի որոշմամբ Մովսես Հակոբյանն ազատվել է գլխավոր ռազմական տեսչի պաշտոնից: