ԱԺ-ում սկսվել է Կոռուպցիայի կանխարգելման հանձնաժողովի առաջին կազմի անդամների նշանակման հարցի քննարկումը: Ինչպես հայտնի է, այս պաշտոններում թեկնածուներ առաջադրելու իրավունք ունեն Կառավարությունը, ԱԺ «Իմ քայլը», «Բարգավաճ Հայաստան» և «Լուսավոր Հայաստան» խմբակցությունները և Բարձրագույն դատական խորհուրդը:

Առաջինը քննարկվել է կառավարության թեկնածուի ընտրության հարցը: Գործադիրն առաջադրել է Լիլիթ Ալեքսանյանի թեկնածությունը, ով ելույթ է ունեցել ու ներկայացրել իր տեսլականը, խոսել է ֆինանսական համակարգում իր աշխատանքային փորձից: Նշել է, որ դրանք կօգնեն իրեն աշխատել նշված ոլորտում:

Ներկայացրել է, որ իր աշխատանքային գործունեության ընթացքում ներգրավված է եղել ու այժմ ղեկավարում է ֆինանսական հաստատության այն ստորաբաժանումը, որն ունի հատուկ գործառույթ, այն է՝ ուսումնասիրել պետական բարձրաստիճան պաշտոնյաների գույքի և եկամուտների հայտարարագրերը և գնահատել դրանց համապատասխանությունը հակակոռուպցիոն պահանջին:

«Հարկ է սերմանել այն գիտակցությունը, որ կոռուպցիան ունի երկու կողմ. առաջինում դրա անհրաժեշտությունն է առաջանում, երկրորդն իրականություն է դարձնում, հետևաբար՝ համակարգային մոտեցումները պետք է ներառեն թե՛ հանրային, թե՛ մասնավոր հատվածը, կոռուպցիան չի կարող արմատախիլ արվել, քանի դեռ կան հաճույքով կաշառք տվողներ»,-ներկայացրել է նա: