Լևոն Երանոսյանի գործով դատարան է ներկայացել Ալեն Սիմոնյանը

Երևանի ընդհանուր իրավասության դատարանի Ավան և Նոր-Նորք նստավայրում դատավոր Հարություն Մանուկյանի նախագահությամբ քիչ առաջ սկսվեց ՀՀ նախկին փոխոստիկանապետ Լեւոն Երանոսյանի գործով դատական նիստը։

Նշենք, որ այսօրվա նիստին դատարան են ներկայացել գործով տուժող ճանաչված անձինք, այդ թվում` ԱԺ փոխնախագահ Ալեն Սիմոնյանը։ Այս պահին դատարանն ապացույցների հետազոտման փուլում է։

Հիշեցնենք, որ համաձայն մեղադրական եզրակացության՝ Լևոն Երանոսյանը հատուկ միջոցների գործադրմամբ դիտավորությամբ կատարել է այնպիսի գործողություններ, որոնք ակնհայտորեն դուրս են եկել իր լիազորությունների շրջանակից և էական վնաս են պատճառել քաղաքացիների իրավունքներին ու օրինական շահերին, ինչպես նաև անզգուշությամբ առաջացրել են ծանր հետևանքներ։

 Նրան մեղադրանք է առաջադրվել ՀՀ ՔՕ-ի 309 հոդվածի 1-ին մասի 2-րդ եւ 3-րդ կետերով։ Նրա նկատմամբ որպես խափանման միջոց է ընտրված ստորագրությունը չհեռանալու մասին։