Կապանի օդանավակայանի շահագործումը կսկսի 2020 թվականի սկզբին

Կապանի օդանավակայանի շահագործումը նախատեսված է սկսել 2020-ի առաջին կիսամյակի ընթացքում: Այս մասին «Հայկական ժամանակ»-ի հարցմանն ի պատասխան՝ նշել է «Սյունիքի օդանավակայան» ՍՊԸ տնօրեն Կարեն Վարդանյանը:

Նշենք, որ նախապես հայտարարվել էր, որ օդանավակայանը պատրաստ կլինի 2018-ի ամռանը: Վարդանյանը նշել է, որ դա այն դեպքում, եթե համապատասխան թույլտվությունների ստացման գործընթացում ձգձգումներ չարձանագրվեն:

Լրատվականը հետաքրքրվել է, թե ե՞րբ է նախատեսված ավարտել օդանավակայանի շինարարությունը, քանի որ հայտարարվել էր, որ այն արդեն ավարտական փուլում է:

 «Աշխատանքներն ընթանում են ողջ ծավալով՝ նախագծային փաստաթղթերով սահմանված ժամկետներին համապատասխան, առանց ձգձգումների: Նշված միջոցառումները ներառում են ոչ միայն բուն շինարարական աշխատանքների իրականացումը, այլեւ նախագծային փաստաթղթերի համաձայնեցումը պետական իրավասու մարմինների հետ, անհրաժեշտ փորձաքննությունները, աշխատանքների արդյունքների փաստագրումը եւ այլն, ինչը պայմանավորված է կառույցի բարդությամբ եւ օդանավակայանի՝ որպես կարեւորագույն նշանակության օբյեկտի, շահագործման առանձնահատկություններով»,- ասել է նա: