Կոռուպցիայի կանխարգելման հանձնաժողովը ստացավ բյուջեից առաջին միլիոնները` աշխատանքները սկսելու ու բնականոն գործունեությունն ապահովելու համար։

Կոռուպցիայի կանխարգելման հանձնաժողովին բյուջեից 6 787 000 դրամ գումար կհատկացվի։ Այս մասին որոշումն ընդունվեց այսօր ՀՀ կառավարության նիստում` առանց քննարկման ու առանց զեկուցման։

Ըստ նախագծի` այդ գումարն անհրաժեշտ է հանձնաժողովի «բնականոն գործունեությունն ապահովելուն ուղղված առաջնահերթ աշխատանքները կազմակերպելու և իրականացնելու» համար։

«Որոշման նախագծի ընդունման արդյունքում հնարավոր կլինի պետական բյուջեից տրամադրված միջոցների հաշվին կատարվելիք աշխատանքների արդյունքում ապահովել նվազագույն պայմաններ Կոռուպցիայի կանխարգելման հանձնաժողովի բնականոն գործունեության համար»,– ասված է նախագծում։

Հիշեցնենք` Կոռուպցիայի կանխարգելման հանձնաժողովը ստեղծվել է 2019թ–ին։ Նոր կառույցը կոռուպցիոն հանցագործությունների քննությամբ չի զբաղվելու, այլ հիմնականում իրականացնելու է կանխարգելիչ, ուսուցողական գործառույթներ, ինչպես նաև վերլուծելու է պաշտոնատար անձանց գույքի ու եկամուտների հայտարարագրերի տվյալները։