Ում ցուցմունքով են դուրս եկել Ալիկ Սարգսյանի «հետքի վրա». «Ժողովուրդ»
ՀՀ ոստիկանության քրեական հետախուզության գլխավոր վարչության պետի նախկին տեղակալ Հովհաննես Թամամյանի ցուցմունքով է նախաքննական մարմինը կոնկրետ անձանց մեղադրանք առաջադրել: Այս մասին գրում է «Ժողովուրդ» օրաթերթը։
«ՀՔԾ-ն «Մարտի 1»-ի գործով սեպտեմբերի 25-ին մեղադրանք առաջադրեց ՀՀ նախկին ոստիկանապետ Ալիկ Սարգսյանին` պաշտոնեական լիազորությունները չարաշահելու, պաշտոնեական կեղծիքի և հանցագործությունը պարտակելու համար:
Թամամյանի ցուցմունքով է նախաքննական մարմինը դուրս եկել հետքի վրա ու կոնկրետ անձանց մեղադրանք առաջադրել»,–գրում է թերթը։Ըստ օրաթերթի` այս քրգործում հիշատակվում են նաև Ոստիկանության նախկին պետ Հայկ Հարությունյանի, Հովհաննես Թամամյանի ու մի շարք այլ բարձրաստիճան ոստիկանների անունները:
Հաշվի առնելով ՀՔԾ-ին օժանդակելը` Թամամյանին ավելի մեղմ մեղադրանք է առաջադրվել:
Թամամյանն ինքը «Ժողովուրդ» օրաթերթի հետ զրույցում չի մեկնաբանել այս լուրերը` ասելով` իմ տեղը հարմար չէ… հետո`անջատելով հեռախոսը:
Հիշեցնենք, որ սեպտեմբերի 25-ին ՀՀ նախկին ոստիկանապետ Ալիկ Սարգսյանին մեղադրանք է առաջադրվել` պաշտոնեական լիազորությունները չարաշահելու, պաշտոնեական կեղծիքի և հանցագործությունը պարտակելու հոդվածներով։
Ըստ մեղադրանքի` 2008–ի մարտի 1-ին և 2-ին Երևանում տեղի ունեցած իրադարձություններից հետո 2008-ին ՀՀ նախագահի օգնականներ Գևորգ Կոստանյանն ու Գևորգ Մհերյանը պահանջել էին հետին ամսաթվով կազմել և շրջանառության մեջ դնել մարտի 1-ին և 2-ին ոստիկանության գործողությունների իրավաչափությունը հիմնավորող փաստաթղթեր:Այդ հարցով հրավիրված խորհրդակցությունից հետո ՀՀ ոստիկանության պետ Ալիկ Սարգսյանը և ՀՀ ոստիկանության մի խումբ բարձրաստիճան պաշտոնատար անձինք ձեռնամուխ են եղել Գևորգ Կոստանյանի և Գևորգ Մհերյանի ցուցումներն ու հանձնարարությունները կատարելուն:
Հիշեցնենք` սեպտեմբերի 23–ին, ժամը 23։50 ոստիկանությունն ահազանգ է ստացել, որ Բջնիի իր առանձնատանը հայտնաբերվել է նախկին ոստիկանապետ Հայկ Հարությունյանի դին` գլխին հրազենային վնասվածքով:
