Ի՞նչ պատասխանատվության է ենթարկվելու Ողջի գետն աղտոտողը. նախարարը մանրամասնում է

SHANTNEWS.am-ն այսօր հետաքրքրվել է ՀՀ շրջակա միջավայրի նախարար Էրիկ Գրիգորյանից, թե ի վերջո ինչ պարզվեց Ողջի գետի աղտոտման պատճառի հետաքննության մասով: 

Հիշեցնենք, որ հոկտեմբերի 17-ին Սյունքի մարզպետն էր կառավարությանը հայտնել, որ գետն աղտոտվել է: Պարզվեց, որ վնասվել է Սյունիքի մարզի Ներքին Գիրաթաղ գյուղի մոտակայքում գտնվող կոմբինատի պոչատարը, ինչի արդյունքում էլ արտանետումները լցվել են Ողջի գետը:  Հոկտեմբերի 27-ի երեկոյան կապանցիները դարձյալ նկատել էին, որ գետն աղտոտվել է: 

«ՀՀ-ում բնապահպանական իրավախախտումների մասով վարչարարությունն իրականացնում է Բնապահպանական և ընդերքի տեսչական մարմինը: Տեսչական մարմինը նմուշառումն իրականացրել է, հետազոտություններն իրականացրել է, անալիզները վերցրել է, կարծում եմ՝ որևէ սահմանափակում իրենք չունեն, որ որևէ լրագրող դիմի` չտրամադրեն»,- ասել է Գրիգորյանը: 

Լրագրողների այն դիտարկմանը, թե դիմել են, բայց չեն տրամադրել, ի վերջո, նախարարությունն ունի պատասխանը, ի՞նչ է ասվում, Շրջակա միջավայրի նախարարը արձագանքել է. 


«Որոշակի մետաղների՝ այլումինի, երկաթի, մի քանիսը, որ տեսա, կոնցենտրացիաները գերազանցում են սահմանային թույլատրելի չափաքանակները: Մի քանի հետազոտություն կա, որոնք վերաբերում են օրգանական մասին, մեկ օրում հնարավոր չէ իրականացնել, այսինքն՝ 3-4 աշխատանքային օր է տևում, ենթադրում եմ` չեն ավարտել»,- ասել է  նախարարը՝ հավելելով, որ իր ենթադրությամբ` քրեական պատասխատանվություն կսահմանվի: