Թուրքիան քուրդ հրամանատարին արտահանձնելու միջնորդություն է ներկայացրել
Թուրքիայի արդարադատության նախարարությունը միջնորդություն է ուղարկել արտգործնախարարություն` պահանջելով «Սիրիական դեմոկրատական ուժեր»-ի (SDF) քուրդ հրամանատար Ֆերհաթ Աբդի Շահինի արտահանձնումը Թուրքիային: Քուրդ հրամանատարն առավել հայտնի է Մազլում Քոբանի կեղծանվամբ, հայտնում է ermenihaber-ը:
Նշվում է, որ միջնորդությանը կցված է նաև Քոբանիի կալանավորման վերաբերյալ դատարանի որոշումը:
Արդարադատության նախարարության գրավոր հաղորդագրության համաձայն` Քոբանիին Թուրքիային արտահանձնելու միջնորդությունը առավել վտանգավոր ահաբեկիչների ցանկում նրա ներառվելուց հետո:
Օրեր առաջ Թուրքիայի նախագահ Ռեջեփ Թայիփ Էրդողանը պետական հեռուստաեթերով ԱՄՆ-ից պահանջել է Անկարային հանձնել վերոհնշյալ քուրդ հրամանատարին:
Հիշեցնենք, որ Թուրքիան Մազլում Աբդի Քոբանիին համարում է Սիրիայում քրդական «Ժողովրդական ինքնապաշտպանական ջոկատների» (YPG) ղեկավարներից: Իսկ ինչպես հայտնի է, YPG-ն էլ թուրքական իշխանությունները նույնացնում են Թուրքիայում ահաբեկչական համարվող «Քուրդստանի բանվորական» կուսացության (PKK-ՔԲԿ) հետ:
