«Ռոյալ» խաղատան ղեկավարության պարզաբանումը` տեղի ունեցած միջադեպի առնչությամբ
Ինչպես արդեն տեղեկացրել ենք, shamshyan.com-ի փոխանցմամբ, այսօր հոկտեմբերի 26-ին Ծաղկաձոր քաղաքի «Ռոյալ» խաղատանը միջադեպ է տեղի ունեցել, որը վերածվել է ծեծկռտուքի:
Ըստ այդմ` ոստիկանության Հրազդանի բաժնի ծառայողները պարզել են, որ նույն օրը, ժամը 01:00-ի սահմաններում, նշված խաղատան անվտանգության պետ, Երևանի բնակիչ, 35-ամյա Գարեգին Կ.-ն իր՝ թվով 10 աշխատակիցների հետ, նշված խաղատանը խաղադրույք կատարելու հարցի շուրջ վիճաբանել են Երևանի բնակիչներ, 38-ամյա Բաբկեն Ա.-ի և 46-ամյա Միքայել Շ.-ի հետ, որի ընթացքում վերջիններս հարվածներ են ստացել, ինչի հետևանքով Միքայել Շ.-ին վնասվածքներ են պատճառվել:
Խաղատան ղեկավարությունը Aurora news-ի հետ զրույցում միջադեպի վերաբերյալ պարզաբանում են ներկայացրել: Ըստ պարզաբանման` ծեծկռտուքը տեղի է ունեցել այն բանից հետո, երբ նշված խաղատան անվտանգության աշխատակիցները խաղատան անվտանգության կանոնները խախտելու համար նկատողություն են արել Երևանի բնակիչներին: Վերջիններս չենթարկվելով անվտանգության աշխատակիցների պահանջներին, անվայել պահվածք են դրսևորել, ինչն էլ ստիպել է աշխատակիցներին նրանց հրելով դուրս բերել խաղատնից:
Փաստի առթիվ ոստիկանության Հրազդանի բաժնի հետաքննչական բաժանմունքում նյութեր են նախապատրաստվում:
