![23-ամյա երիտասարդը բարձրաձայն հայհոյել է, իսկ հետո դանակով հարվածել իրեն դիտողություն անողին](https://auroranews.am/storage/img/base_image/old/ef25ff54239ab4a46305ad889ad22784.webp)
23-ամյա երիտասարդը բարձրաձայն հայհոյել է, իսկ հետո դանակով հարվածել իրեն դիտողություն անողին
![23-ամյա երիտասարդը բարձրաձայն հայհոյել է, իսկ հետո դանակով հարվածել իրեն դիտողություն անողին](https://auroranews.am/storage/img/base_image/old/ef25ff54239ab4a46305ad889ad22784.webp)
ՀՀ քննչական կոմիտեի Երեւան քաղաքի քննչական վարչության Արաբկիր վարչական շրջանի քննչական բաժնում քննվող քրեական գործի շրջանակներում պարզվել են 31-ամյա տղամարդու դանակահարության դեպքի հանգամանքները: Մեղադրանք է առաջադրվել 23-ամյա երիտասարդի:
ՀՀ Քննչական կոմիտեից հայտնում են, որ նախնական տվյալներով՝ 2019 թվականի հոկտեմբերի 1-ին՝ ժամը 17:53-ին, «Իզմիրլյան» ԲԿ-ից ոստիկանության Արաբկիրի բաժին ահազանգ է ստացվել այն մասին, որ «որովայնի առաջին եւ ձախ առաջակողմնային պատերի կտրած-ծակած վերք» ախտորոշմամբ իրենց մոտ է տեղափոխվել 31-ամյա տղամարդ, ում, ըստ հարազատների, բակում դանակով հարվածել են:
Դեպքի առթիվ ՀՀ ՔԿ Արաբկիր վարչական շրջանի քննչական բաժնում հարուցվել է քրեական գործ՝ ՀՀ քրեական օրենսգրքի 112-րդ հոդվածի 1-ին մասով:
Նախաքննության ընթացքում պարզվել է, որ 2019 թվականի հոկտեմբերի 1-ին՝ ժամը 15:00-ի սահմաններում, Երեւան քաղաքի Ազատության փողոցում գտնվող շենքի՝ իր բնակարանում 23-ամյա երիտասարդը հեռախոսով խոսելու ընթացքում բարձրաձայն հայհոյանքներ է հնչեցրել, որը լսելի է եղել հարակից շենքերի բնակիչներին, ինչի կապակցությամբ հարեւան շենքի բնակիչներից մեկը՝ ծնված 1988թ., իր ընկերոջ հետ գնացել է երիտասարդի բնակարան եւ դիտողություն արել վերջինիս՝ բարձրաձայն հայհոյանքներ հնչեցնելու համար, ինչին ի պատասխան 23-ամյա երիտասարդը ներողություն է խնդրել:
Այնուհետեւ նույն օրը՝ ժամը 17:15-ի սահմաններում, երիտասարդը, իրեն դիտողություն անելու շուրջ պարզաբանումներ պահանջելու համար, 31-ամյա տղամարդուն կանչել է բակ եւ իր ձեռքում եղած սուր կտրող-ծակող գործիքով դիտավորությամբ հարվածներ է հասցրել վերջինիս որովայնին՝ պատճառելով կյանքին վտանգ սպառնացող ծանր վնաս եւ դիմել փախուստի:
Քննության ընթացքում կատարվել են մի շարք քննչական գործողություններ, կատարվել են առգրավումներ, խուզարկություն, հարցաքննվել են վկաներ: Քրեական գործով էական նշանակություն ունեցող հանգամանքներ պարզելու համար նշանակվել է դատաբժշկական փորձաքննություն:
2019 թվականի հոկտեմբերի 3-ին վարույթն իրականացնող մարմնի կողմից որոշում է կայացվել՝ 23-ամյա երիտասարդին ձերբակալելու մասին, որի կատարումը հանձնարարվել է ՀՀ ոստիկանության Արաբկիրի բաժնին:
2019 թվականի հոկտեմբերի 7-ին՝ ժամը 19:00-ին 23-ամյա երիտասարդը ինքնակամ ներկայացել է ՀՀ ՔԿ Արաբկիր վարչական շրջանի քննչական բաժին եւ ձերբակալվել՝ 31-ամյա տղամարդու առողջությանը դիտավորությամբ ծանր վնաս պատճառելու կասկածանքով:
Ձեռք բերված բավարար ապացույցների հիման վրա՝ Երեւան քաղաքի 23-ամյա երիտասարդին մեղադրանք է առաջադրվել՝ ՀՀ քրեական օրենսգրքի 112-րդ հոդվածի 2-րդ մասի 9-րդ կետով: Նրա նկատմամբ որպես խափանման միջոց է ընտրվել կալանավորումը:
Նախաքննությունը շարունակվում է: