Մենք ամենաբարձր աշխատավարձերի եկամտահարկը 13 տոկոսի չափով իջեցրել ենք, ինչի՞ համար, որ մեր երկիրը բարձր աշխատավարձ վճարող ընկերությունների համար լինի գրավիչ:

 Այս մասին այսօր՝ ՀՀ կառավարության նիստում, ասաց վարչապետ Նիկոլ Փաշինյանը՝ արձագանքելով փոխվարչապետ Մհեր Գրիգորյանին:

Գրիգորյանը նշել էր՝ հարկային արտոնությունը լավագույն գործիքը չէ, որը կխթանի, որ շուկան լցվի համապատասխան ընկերություններով, քանի որ սկզբում այդպես բերում ենք ընկերություններին, հետո արտոնությունը հանում ենք.

 «Ստացվում է, որ ի սկզբանե խաղի կանոնը խախտել ենք: Մենք պետք է ձեռնպահ մնանք հարկային արտոնությունը որպես խթան օգտագործելուց: Հիմա եթե այդ ընկերությունները գան, մենք հավերժ իրենցից հարկ չե՞նք վերցնելու»:

Ի պատասխան՝ վարչապետն ասաց. «Մենք ամենաբարձր աշխատավարձերի եկամտահարկը 13 տոկոսի չափով իջեցրել ենք, ինչի՞ համար, որ մեր երկիրը բարձր աշխատավարձ վճարող ընկերությունների համար լինի գրավիչ: Որովհետեւ մենք չենք ուզում մնալ այնպիսի երկիր, որտեղ 60 հազար դրամ աշխատավարձը  համարվում է նորմալ երեւույթ: Մենք ուզում ենք դառնալ երկիր, որտեղ 1 մլն դրամ, 1.5 մլն դրամ, 2 մլն դրամը աշխատավարձն է դառնում նորմալ երեւույթ: Օրինակ՝ եթե Հայաստանում արբանյակ արտադրող ընկերություն հայտնվի, ոչ մի խնդիր չկա, որ նա ունենա հարկային արտոնություն, քանի որ դա որպես ֆլագման ամբողջ տնտեսությունը կարող է տանել իր հետեւից ու երկրի վարկանիշը էականորեն կբարձրացնի»,- ասաց վարչապետը: