Գիշերօթիկում ավելի շատ աշխատող կա, քան երեխա․ Փաշինյան

«Վերջին շրջանում աղմուկ է ձևավորվում, թե իբր մենք տարեցների խնամքի տուն ենք փակում կամ գիշերօթիկ դպրոց», – կառավարության նիստի սկզբում այս մասին հայտնեց ՀՀ վարչապետ Նիկոլ Փաշինյանը։ Դրա համար, ըստ նրա, պետք է մատչելի բացատրել նոր կարգավորումները։

Փաշինյանն անդրադարձավ գիշերօթիկների փակման հարցին և ասաց, որ իրենց դիտարկումների համաձայն՝ գիշերօթիկում ավելի շատ աշխատող կա, քան երեխա։

Նա նշեց, որ իրենց նպատակն այդ երեխաների խնամքն է, ոչ թե աշխատատեղերը պահելը։

«Մեր խնդիրն է, որ մենք երեխայի շահերը պաշտպանենք։ Եվ էն ֆինանսական միջոցները, որ դրվում են էդ նպատակի համար, հիմա էս փոփոխությունների արդյունքում պետք է գնան երեխայի հետևից, մտնեն երեխայի ընտանիք», – ասաց Փաշինյանը։

Աշխատանքի և սոցիալական հարցերի նախարարի ներկայացրած կարգավորումը վարչապետը վերաձևակերպեց և ասաց, որ տարեցների խնամքի ծառայություններն իրենք փորձում են ոչ թե կասեցնել, այլ արտապատվիրակել մասնավոր կամ բարեգործական կազմակերպությունների՝ մրցույթով։

Տարեցը, ըստ նրա, պետք է ինքն ասի՝ որ կազմակերպությունն է նախընտրում, և պետական ֆինանսավորումը կուղղվի հենց այդ կազմակերպությանը